【父親節】《愛·回家之開心速遞》爸爸性格大不同 邊位係你心目中嘅理想爸爸?

無綫處境劇 《愛·回家之開心速遞》收視及人氣一直高企,劇情主要圍繞「熊家人」嘅生活點滴,題材貼地又不失趣味,經常帶無限歡樂俾觀眾。劇集除咗有「爸爸」熊樹根之外,都仲有唔少爸爸角色,既然父親節就嚟到,不如就同大家睇下劇中嘅「爸爸」角色,唔知以下有冇邊位係你心目中嘅理想爸爸呢?

熊樹根 (劉丹飾)

熊家一家之主,太太離去後一直身兼父母職。雖然佢為人較孤寒度縮,不過佢平日努力打理運輸公司生意,樣樣親力親為,仲好有正義感。佢有三位千金,分別係大女熊尚善(滕麗名飾)、二女熊若水(呂慧儀飾)及細女熊心如(蘇韻姿飾)。有時佢都會有偏心行為,叫熊若水讓吓個細妹,但係內心都係真心為佢哋,仲間唔中煮晚餐一家人聚首一堂,係一位典型父親。

熊樹根 (劉丹飾)

龍敢威(羅樂林飾)

威龍百貨公司集團總裁龍敢威,好有錢,喺社會上亦有權有勢。除咗做生意好叻之外,佢生性多情,有四位太太之外,仲有唔少年輕嘅女朋友。而親生仔女都有唔少,包括龍力蓮(林淑敏飾)、龍力士(鄭世豪飾)、龍力王(李偉健飾)及私生子龍璟風(陳浚霆飾)等等,但係佢哋關係疏離,唔同房嘅仔女經常勾心鬥角,好似為咗做集團接班人,龍力士及老婆Jenny(陳偉琪飾)經常搞小動作。早前佢仲因為過勞入院,好似龍力蓮回巢幫手打理生意。

龍敢威(羅樂林飾)

譚道德(陳榮峻飾)

譚道德為人比較墨守成規、思想老舊,死板又沒趣,佢同太太何容儀(吳香倫飾)育有一女Bonnie譚育英(林凱恩飾)。Bonnie自細被譚道德夫婦薰陶,加上家規嚴厲,所以一直都係一個守規距嘅乖乖女。佢經常希望斷絕Bonnie七情六慾,唔想佢令自己作出錯誤選擇,誤入歧途。譚道德知道Bonnie與安仔(周嘉洛飾)拍拖後,對佢管教得更嚴厲。譚道德可以話絕對係一個「超級虎爸」,想掌管女兒一切。

譚道德(陳榮峻飾)

宋瑞輝(許家傑飾)

「送水輝」宋瑞輝與太太離婚後獨自照顧Philip仔(梁禹勤飾),曾經做過送水工人、出租男伴及尋寶圖職員嘅佢,努力儲錢後終於擁有一個酒吧,成為老闆。佢平日好多時都會以仔仔為先,用盡自己方法保護Philip仔,如果知道佢被同學欺負,亦會立刻到學校了解事情。

宋瑞輝(許家傑飾)

朱展(陳嘉輝飾)

除咗係一位律師之外,朱展亦係朱凌凌(吳偉豪飾)及朱天梯(梁証嘉飾)嘅爸爸。因為自己工作身份職位高,家族亦係律師世家,所以一直希望朱凌凌可以承繼衣砵,對佢充滿期望。不過朱凌凌熱愛攝影,唔想繼承家族生意,所以經常同爸爸朱展力抗到底。朱展間唔中會出招想佢轉系,例如扮病及收買同學仔等等,不過都係失敗收場。

朱展(陳嘉輝飾)

池富(王俊棠飾)

池富平時市儈又貪心,經常周圍搵著數。育有一子一女嘅佢,平日極度偏心女兒池美麗(鍾凱琪飾),會諗盡方法滿足佢。同時經營運輸公司嘅佢,一直努力工作供養子女讀書,為自己成為「大學生爸爸」而驕傲,不過有時因自己學歷低而自卑,擔心被子女睇唔起,係一個典型基層嘅傳統麻甩爸爸。

池富(王俊棠飾)