【父親節快樂!】呢班藝人首次以爸爸身份迎接父親節

今個星期日就係父親節,唔知大家諗咗啲咩活動同爸爸慶祝呢?喺過去呢一年有唔少香港藝人都榮升新手爸爸,嚟緊仲會同仔女過第一個父親節,而家就同大家數一數有邊幾位啦!

鄭嘉穎

鄭嘉穎

鄭嘉穎同陳凱琳雖然年齡差距22年,不過無阻真愛,喺上年8月於峇里島結婚。Grace喺今年2月14日誕下囝囝鄭承悅(Rafael),一索得男。新手爸爸鄭嘉穎就減少出埠工作,將全副心機投放喺家庭,實行做湊仔公。因為擔心老婆太辛苦,佢仲擔當半夜餵奶嘅責任。

陳展鵬

陳展鵬

陳展鵬同單文柔喺上年10月修成正果,正式拉埋天窗。佢哋更火速造人成功,喺今年4月中單文柔誕下囡囡「小豬比」(Quinta)。日前,無綫劇集《唐人街》已經煞科,陳展鵬終於有得放假,可以專心照顧老婆同囡囡。

陳柏宇

陳柏宇

陳柏宇(Jason)與符曉薇喺前年結婚,而愛情結晶品囡囡Abigail就喺上年9月出世。新手爸爸Jason表現相當興奮,除咗幫囡囡開個人IG之外,佢仲化身「晒女狂魔」不時上載囡囡嘅相片同大家分享。早前老婆出埠工作,Jason就可以獨霸囡囡,除咗餵奶同換片之外,Jason仲帶埋8個月大嘅囡囡去電台宣傳新歌。

王祖藍

王祖藍

被稱「最萌身高差」嘅王祖藍及李亞男結婚4年,係娛樂圈嘅模範夫妻。婚後一直渴望有小朋友嘅佢哋,喺上年7月公布懷孕喜訊,而囡囡王天韻(Gabrielle)喺上年12月出世。有傳佢哋計劃追仔,所以李亞男諗住追完第二胎先收身。佢哋日前就去咗巴塞隆拿出席朋友嘅婚禮兼旅行,被問到係唔係順道追多個嘅時侯,王祖藍就話梗係會再追。咁大家就等佢哋嘅好消息啦!

陳智燊

陳智燊

陳智燊(Jason)同宋熙年喺2016年結婚,婚前婚後都好恩愛嘅佢哋,係圈中嘅模範夫妻。喺上年4月,佢哋公布懷孕喜訊,而囝囝Damon就係8月出世。現時囝囝已經9個月大,仲已經識叫爸爸,令到Jason甜在心頭。