父親節就到啦!重溫無綫爸爸題材劇集

一年一度嘅父親節仲有幾日就到,唔知大家諗咗啲咩節目同爸爸慶祝呢?其實無綫以往都有唔少劇集係以爸爸為題材,去讚揚爸爸們嘅努力同付出。唔知以下呢幾套你哋有冇睇過呢?

《當旺爸爸》(2012年)

父母一生勞勞役役養育自己嘅仔女。由夏雨、鍾嘉欣及馬浚偉領銜主演嘅《當旺爸爸》,正正要帶出訊息俾大家知道,呢個世上只有自己父母嘅愛是真切的,是不求回報的。故事主要係講述做當舖老闆高義文(夏雨飾)一人身兼父母兩職去照顧三個子女,分荊係高威庭(麥長青飾)、高如珠(鍾嘉欣飾)及高如寶(樂瞳飾),又稱為「高家三寶」!日子一日一日咁過去,仔女一日比一日成長。高義文睇住三個仔女各有所長又孝順,身為爸爸嘅義文本應老懷安慰。不過三個仔女都遇著唔好嘅境況,爭啲令到呢個家庭四分五裂,最後義文無悔地盡為自己三寶付出及犧牲唔少。

無綫劇集《當旺爸爸》截圖

《絕世好爸》(2002年)

劇集由秦沛、陳慧珊、郭羨妮、劉錦玲及胡杏兒領銜主演,主要講述爸爸(秦沛飾)本身係一位深得上司歡心及賞識嘅警察,因為早年喪妻身兼父母職養育4個女。四姐妹自細已經互相幫助,相親相愛!雖然4個女都好孝順,不過爸爸仍然唔放心,而且最擔心更係佢哋人生大事。不過好景不常,爸爸發覺自己開始有病,做事時突然手震,亦開始記憶力偏差,正擔心自己有腦退化時就俾4個寶貝女發覺有問題。4個寶貝囡決定要令爸爸放心,做好自己,選擇好自己人生,並要將爸爸醫好。

無綫劇集《絕世好爸》截圖

《爸爸閉翳》(2007年)

劇集有小青姐做監製,搵嚟歐陽震華、蒙嘉慧、王喜及夏雨等人主演,講述現時香港仍然有家庭會按仔女大細排行,去講愛錫及「分豬肉」程度,可以睇得出有父親觀念上仍然有好傳統嘅家庭觀念。今次劇集用輕鬆手法去講出其實為人爸爸嘅苦與樂,而且經常強調訊息俾人知道「世上萬物,皆有其價值,唯獨親情是無價。」就算有好多物質可以滿足都好,但親情係用錢買唔到嘅。

無綫劇集《爸爸閉翳》 截圖

《巴不得爸爸…》(2009年)

由姜大偉、黃淑儀、吳卓羲、陳錦鴻、胡杏兒及楊思琦主演嘅一套穿越喜劇。劇中父親楚帆(陳錦鴻飾)嘴邊經常掛住一句:「人人為我,我為人人!」,從來唔介意被人佔便宜。相反仔仔楚慈(吳卓羲飾)正正性格相反,為人口甜舌滑,對人又漠不關心。就係因為父子性格相反,所以經常鬧交。因為8號風球時嘅一場意外,楚慈竟然時光倒流返去60年代,仲見返年輕嘅爸爸,仲同佢成為好朋友。本身楚慈想藉呢個時候去改變阿爸性格,點知經歷種種經歷後,改變最多嘅竟然係佢自己。

無綫劇集《巴不得爸爸…》截圖

《超能老豆》(2016年)

一聽劇名就知道係講爸爸又幾厲害,仲要如超人一樣。劇集由李思捷、陳智燊同黃智雯主演,劇情主要講述常念書(陳智燊飾)及何樂姿(趙希洛飾)係一對有仔女嘅夫妻。因為樂姿由澳洲回流返港,所以思想性格開放,同思想傳統的老爺常新(潘志文飾)為咗一對仔女嘅教育問題而經常爭執,身為老公及人地個仔嘅常念書好慘成日夾心人,手掌手背都係肉!而李思捷飾演嘅谷自強,係一名地產經紀,因為同老婆離婚,所以同囝囝谷筱楠唔可以成日見面。之後佢前妻再婚,佢就答應照顧囝囝。賺錢大過天嘅自強,因為無時間照顧囝囝,於是就幫囝囝喺諸麗花(黃智雯飾)嘅補習社報讀所有課程,最後仲同諸麗花又鬥氣冤家,變成夫妻。

無綫劇集《超能老豆》截圖

《盞鬼老豆》(1996年)

劇集由廖偉雄、龔慈恩、許紹雄、馬敏兒、洪朝豐主演,劇情主要講述天生有陰陽眼嘅栗昭(廖偉雄飾)不務正業,更與妻子離婚5年,無聊咁渡過日子。有一次佢去經銀行時,巧遇劫匪打劫,貪心嘅佢本身想博取意外死亡保險金,咁就有大筆錢,唔知係咪天意弄人,昭偏偏就大難不死,仍然維持生命。但前生係警察而熱愛生命而又愛妻嘅鍾晴(許紹雄飾)就不幸於銀行中槍身亡。晴因為重家庭,所以唔能夠安心離世,於是搵咗死唔去嘅昭上身,借他身體附身再去照顧家人。估唔到,往往就係錯過先識得後悔,昭照顧家人嘅過程中,先知道自己原來一直忽略屋企人,仲決心要追返前妻。

無綫劇集《盞鬼老豆》截圖