【父親節】一文睇清!呢班藝人以新手爸爸身份迎接首個父親節

今個星期日就係一年一度嘅父親節,各位諗咗啲咩活動同買咩禮物俾「一家之主」呢?喺過去呢一年有唔少香港藝人榮升做新手爸爸,佢哋將會第一次過屬於自己嘅父親節,而家就同大家數下有邊幾位啦!


周柏豪

周柏豪(Pakho)與拍拖10年女友Stephanie喺2016年拉埋天窗,上年12月迎接囡囡芯悅(Sonya)出世。柏豪榮升老竇後,不時喺社交網站上載與囡囡嘅生活點滴,不過柏豪好保護囡囡私隱,每次嘅相片都只係見到囡囡一小部分。

周柏豪

羅仲謙

娛圈恩愛夫妻羅仲謙及楊怡結婚近4年,婚後不設防努力造人嘅佢哋,喺楊怡40歲終於有好消息,今年2月宣布造人成功,更喺今年4月誕下愛情結晶品「小珍珠」。早前羅仲謙上載錫囡囡腳趾仔嘅相片,更自稱係戀足狂爸,真係好溫馨呀!雖然羅仲謙忙於拍攝無綫新劇《陀槍師姐2020 》,不過每次提起囡囡都一臉幸福。

羅仲謙

古巨基

喺2014年,古巨基與助手Lorraine結束20年愛情長跑,上年年底老婆更喺美國秘密誕下囝囝Kuson。一向行事低調嘅基仔,早前罕有地喺社交網站上載全家福,真係好溫馨呀!

古巨基

黃澤鋒

黃澤鋒與老婆陳麗麗結婚10年,多年嚟一直努力造人,不過都冇喜訊。直至上年初,太太以52歲超高齡懷孕,喺7月誕下囡囡「小黃妃」熙恩。老來得女嘅黃澤鋒,錫囡囡錫到燶,仲經常喺社交網站上載同「前世情人」嘅相片,唔少人都大讚囡囡眼仔碌碌好得意。

黃澤鋒

林子善

林子善喺2017年與圈外女友董佩欣(Kary)結婚,上年年底太太誕下囡囡「小乖乖」林以晴。佢除咗係廿四孝老公之外,仲係廿四孝爸爸,經常將囡囡放喺第一位,不時喺社交網站上載湊B趣事同網民分享。

林子善

伍家謙

無綫前體育新聞主播伍家謙,與太太謝麗萍結婚6年,喺今年4月太太誕下龍鳳胎「思行」Archibald及「思齊」Audrey。新手爸爸伍家謙仲經常喺社交網站上載湊仔生活,一次過要湊兩個真係一啲都唔簡單,佢要幫BB餵奶、掃風及換片等等,搞到每天都係瞓得3至4個鐘。

伍家謙

黎振燁

喺4月,黎振燁被爆出與朱智賢於車廂幽會後,二人形象即時插水,無綫決定暫停佢哋工作。雖然被送入雪櫃,不過黎振燁仍然獲得大肚老婆嘅原諒。喺本月初,黎太剖腹誕下囝囝。

黎振燁