《爆炸性醜聞》揭新聞部桃色糾紛 真人版高層淫魔竟然有好下場

由查理絲花朗、妮歌潔曼、瑪歌羅比主演嘅《爆炸性醜聞》先喺金球獎獲得最佳劇情片女主角、最佳女配角提名;剛剛又入圍4項美國演員工會大獎,包括最佳整體演出,查理絲花朗提名最佳女主角,妮歌潔曼、瑪歌羅比分別提名最佳女配角,查理絲花朗絕對有望再下一城,成為奧斯卡最佳女主角大熱!

電影以美國霍士電視新聞台性騷擾真人真事改編,講述「傳媒教父」Roger Ailes以權欺壓下屬作出性騷擾,仲令電視台充斥住男人主導,可肆意批評女同事嘅工作環境,Carlson(妮歌潔曼 飾)因為多次拒絕Ailes嘅無理要求而遭炒魷,引發多名霍士員工出面指證Alies,位高權重嘅Ailes其實禽獸一名!

電影雖然以真人真事改編,不過並唔係全部真實,好似由瑪歌羅比飾演嘅Kayla就係虛構角色,戲內嘅Kayla自稱為千禧世代嘅基督代言人,全家人繼耶和華外最信奉就係霍士新聞,初出茅蘆嘅佢野心勃勃,為咗升職咩都肯做,偶然接觸到Ailes,一心以為可以上位先發現成名代價不菲!

Kayla角色融合咗十幾個受害人嘅遭遇而寫成,通過呢個虛構嘅角色,放大當權者如何欺壓下屬、踐踏女性尊嚴及心靈,因為無真人作參考,都幾考瑪歌羅比演技,睇住Kayla受嘅屈辱,無論男女都會同情佢嘅遭遇。《爆》無一面倒寫Ailes係衰人、女主角們係受害者,以Kayla為例,職場受到性騷擾雖然過份,但本身想成名上位嘅慾望,間接縱容、默許Ailes多年嘅獸行。

另一個虛構角色包括由Kate McKinnon飾演嘅節目監制Jess Carr。角色隱瞞自己係同性戀,因為懼怕秘密被揭發兼炒魷,就算察覺職場性騷擾問題但拒絕發聲,借此點出新聞台中不少女性位不如Carlson或Megyn Kelly高,處於弱勢地位面對不公只能啞氣吞聲,默默承受。

醜聞雖以妮歌潔曼飾演Carlson引爆,但現實嘅Carlson當年因為被逼簽下保密條約,所以唔講得亦唔可能參與電影創作,Megyn Kelly不受此限,佢仲出埋自傳講佢喺霍士新聞台嘅日子,亦都解釋咗點解查理絲花朗先係女主角!

對於不公嘅事要持續發聲,Alies性騷擾員工多年,但無受到應有制裁。事件揭發後,霍士大灑金錢掩飾其惡行,對外宣佈佢辭去職務,仲發放4千萬美金解僱費,事隔2個月佢亦已經搵到新工,就係幫特朗普準備與希拉莉嘅首次總統候選人辯論,做埋咁多衰嘢仲有咁多錢分,公平咩?