無綫花旦走完下一個又一個 呢幾位有冇機會頂上?

今年無綫再次出現離巢潮,花旦方面先有李施嬅喺年頭離開,亦有傳田蕊妮同胡定欣喺年尾約滿後亦會相繼出走,兼且有李佳芯疑似被雪藏。咁無綫仲有邊啲女星可以頂上呢?

蔡思貝

2013年參選港姐嘅蔡思貝當選之後,隨即參與過好多戲劇作品,但係就得唔到觀眾嘅青睞,紛紛批評佢演技太生硬,把聲太刺耳呀!不過蔡思貝接受大家意見,近年仲積極跑步、修身變靚及努力改善演技。 喺《踩過界》中不惜扮醜飾演火雞姐,令好多觀眾刮目相看,更勇奪當年「最佳電視女角色」獎,都算係無浪費一番努力,受到大家肯定。

待播及拍攝中劇集:《機場特警》及《使徒行者3》

陳敏之

生完bb就即刻復出嘅陳敏之,唔知係咪外型成熟咗,飾演多咗好多女強人嘅角色,以往陳敏之多數只係做配角,例如有《怒火街頭》嘅「索腿天后」,但最近已經成功擠身上第二女主角。令大家最印象深刻嘅當然係《溏心風暴3》入面同唐文龍嘅不倫戀,師奶們睇到好鬼嬲呀,仲話佢係女人公敵,睇嚟敏之嘅演功的確進步不少,大家都睇得好投入呀!

待播及拍攝中劇集:《法證先鋒IV》

黃智雯

胡說八道會嘅成員走下一個又一個,好多之前力捧嘅女星都相繼離巢,淨底嘅黃智雯應該可以話係有大好機會俾佢上位,去年嘅《三個女人一個因》黃智雯要變身成為三個截然不同嘅性格,算係攞正牌比佢發揮。不過唔知係咪高層始終覺得佢未夠火喉,所以將套劇安排於周日播出,所以收視都係平平。

待播及拍攝中劇集:《十八年後的終極告白》、《降魔的2.0》及《使徒行者3》


張曦雯

從主持到劇集,無綫對張曦雯(Kelly)嘅待遇算是非常好,喺外國長大嘅kelly ,回流返香港之後一路都做主持工作,鬼妹仔性格非常開朗,fit 爆身形加上精緻外貌,一下子就成為新一代索爆女神。無綫咁識做梗係即刻俾機會佢擔正幾套劇啦,令佢成功入屋!雖然張曦雯超得觀眾緣,人氣亦到爆燈,但係都有負評㗎,演技麻麻就不在話下,更有網民批評佢係「再造人」,同以往嘅樣子有出入呀!

待播及拍攝中劇集:《木棘証人》