無綫綠葉王曾守明 心臟血管問題暴瘦20磅

睇劇,實睇一定睇綠葉,當年黎耀祥都係咁打出頭咋!至於呢期最多人講嘅,就輪到55歲嘅曾守明。

不過今次網民咁關心佢,係因為有觀眾發現喺第941集《愛·回家》出現嘅曾守明暴瘦咗好多,原本肥嘟嘟嘅面珠而家都凹晒。更加有眼利網民發現,其實佢喺《實習天使》入面已經開始瘦咗好多。唔少網民都話好擔心佢嘅健康。

知道咁多人關心佢之後,曾守明就表示因為心臟血管有問題,瘦咗20磅有多,做咗個比通波仔更複雜嘅大型手術,正在康復中。佢仲話一直都係170幾磅,而家就150幾磅。

佢已經開始食返嘢同增磅,啱啱出席新劇《鐵馬戰車》宣傳嘅時候精神亦都唔錯。各位網民唔使擔心啦!希望快啲可以見返好有「福相」嘅曾守明啦!