無綫經常被鬧 三屆視帝黎耀祥抱不平

黎耀祥

三屆視帝黎耀祥喺上年5月與無綫轉簽部頭合約,雖然唔再係親生仔,不過祥仔仍然好撐無綫,早前接受傳媒專訪嘅時候,佢仲話經常鬧無綫嘅人,佢覺得係冇良心。

雖然大家未必同意佢咁講,不過無綫的確為佢帶嚟事業嘅高峰。現年55歲嘅黎耀祥入行已經34年,佢嘅演技相信冇觀眾會質疑。入行多年嘅佢,起初一直都只係做綠葉角色,直至2008年憑《秀才愛上兵》獲得最佳男配角,之後開始一帆風順。2009年《巾幗梟雄》「柴九」、2010年《巾幗梟雄之義海豪情》「劉醒」及2012年《大太監》「李連英」分別令佢獲得「最佳男主角」,名利雙收,登上事業嘅高峰。

祥仔喺專訪仲話佢剛入行嘅時候,當年嘅男主角係梁朝偉、苗喬偉同埋黃日華,所以佢已經好清楚自己嘅位置。而佢可以喺44歲嘅時候首次擔正做男主角,之後嘅十年有劇拍又得到廣告商嘅愛戴,所以佢覺得自己賺多咗。

近月嘅反修例運動,唔少人都批評無綫新聞報道偏頗失實,所以紛紛罷睇及有抵制行動。雖然好多人話要罷睇,不過祥仔就覺得好多觀眾都仲係好需要無綫,就算佢幾差都好,好多人放工都會返屋企睇電視,因為唔係個個人都有錢出去娛樂。

不過祥仔都唔係一味盲撐無綫架,佢都知道無綫嘅收視及影響力已經今非昔比,仲話明白時代不同咗,大家嘅選擇亦都多咗,以前《巾幗梟雄》有49點,而家加埋myTV SUPER先得二十幾點,所以不如專注做好現有嘅客人,因為冇客人嘅話嗰個行業就會被淘汰。