無綫新一姐陣勢 呢5位有冇資格?

想當年無綫花旦人才眾出,好似有佘詩曼、田蕊妮、楊怡及胡杏兒等等,不過呢幾年佢哋都相繼離巢,有啲北上發展,有啲結婚生仔,人才嚴重流失。無綫急急腳喺一班小花中搵人頂上女一之位,近排有幾位狀態越戰越勇,有湯洛雯、龔嘉欣、朱晨麗、蔡思貝及張曦雯,佢哋幾位都有劇擔正做女一,而且各有特色。

湯洛雯

湯鎮業個姪女湯洛雯,當年以大熱姿態參選港姐, 可惜最後只獲得「旅遊大使獎」及「美麗昇華大使獎」兩個獎項。之後開始拍攝處境劇《愛•回家》裡飾演「李思思」一角同《學是學非》而為人熟悉。湯洛雯因為個靚樣而俾人叫做「靚湯」,不過入行至今緋聞都唔多,當中最為人知道嘅就係羅天宇,但佢哋喺18年已經宣佈分手。雖然感情冇著落,但事業越嚟越好。早排有《丫鬟大聯盟》做女主角,近排又有頂替黃心穎拍攝嘅《法證先鋒IV》出街,雖然只得一個月拍攝,但佢嘅表現連對手黃浩賢都大讚。啱啱佢又收到新劇首次坐正女一,好明顯係上緊位。

龔嘉欣

喺啱啱播映完嘅《大醬園》中演飾奸角嘅「細么」嘅龔嘉欣,亦都係一劇接一劇,《大醬園》中佢奸到出汁嘅演技,真係睇到班觀眾好嬲。其實龔嘉欣已經喺無綫做咗超過十年,當中都有經典角色,例如《幕後玩家》Carmen及《平安谷之詭谷傳說》初一等等,精湛演技嘅佢呢排成為監製搶手貨,已經接咗兩個劇,絕對上位有望。

朱晨麗

2011年港姐冠軍朱晨麗,入行八年一直努力學好廣東話及增值自己,有最拼搏花旦之稱,獲不少監製賞識。肯搏肯捱嘅朱朱,劇集戲份越嚟越重,由2012年擔演配角,去到2017年《特技人》首度擔正。佢嘅演技亦慢慢被認同,2017年憑《超時空男臣》中嘅二小姐獲得「最佳女配角」,甚至連《多功能老婆》監製陳寶華都睇好佢可以上位。劇接劇嘅佢,繼《多功能老婆》及《大醬園》之後,連播映中嘅《法證先鋒IV》都有佢嘅演出,明顯備受力捧。除咗事業得意之外,愛情方面都好甜蜜,佢同何廣沛嘅緋聞,由17年《超時空男臣》傳撻著就冇停過,有時仲被記者拍到約會。

張曦雯

張曦雯(Kelly)2012年參選「國際中華小姐」,選美後簽約無綫。操得一口流利英語嘅佢,一開始被委任做明珠台《港生活·港享受》及《東張西望》時段內的《Pearl Tonight》主持,當時已經被網民大讚佢靚女。之後,佢仲擔任旅遊節目《3日2夜》主持,喺節目中盡展噴血身材,成為宅男心目中嘅女神。2016年開始參與劇集拍攝,當中喺《跳躍生命線》擔任女一,演出備受關注。而啱啱喺《萬千星輝頒獎典禮2019》獲「飛躍進步女藝員」嘅張曦雯,風頭一時無兩。

蔡思貝

2013年港姐亞軍蔡思貝,加入無綫後即被力捧,2015年就升呢做女主角,出道至今做過唔少「衝動新人」嘅角色,被唔少網民批評佢演技生硬及把聲太尖太嘈,搞到好多觀眾唔鍾意睇佢嘅演出。近年佢嘅演技開始成熟,觀眾對佢嘅表現亦開始改觀,例如《踩過界》嘅哨牙又粗魯黑社會師爺趙正妹(癲姐)、《大帥哥》革命黨成員兼大帥哥嘅妻子章沅婉及《鐵探》臥底招喜悦(Jill),睇得出佢喺演技、聲線同埋講對白嘅速度都落咗唔少苦功,成功洗底。另外,佢擔正嘅《機場特警》終於係三月底播出,有興趣收睇嘅話,到時記得留意啦!