《為食神探》同《巨輪II》撞晒人 網民有咩評價?

當大家都將焦點放咗喺《巨輪II》劉思希個佛地魔鼻嘅時候,咁另一齣劇集《為食神探》網民又有咩評價呢?

1. 馬明唔襯拍呢類劇
馬明喺劇集入面飾演一個kai kai地嘅「神探」,簡單來講,佢今次係做一個懶醒、宅男丶愛幻想嘅「神探」。網民就話完全破壞晒佢之前嘅好男人形象,今次角色完全唔啱戲路,紛紛都話唔明點解馬明會淪落到做呢啲角色。最慘嘅係明明係男一,依家反而感覺阮兆祥就更加似係男主角。本來鐘意馬明嘅網民仲表示睇佢做呢套喜劇都覺得好尷尬。

2. 同《巨輪II》撞人(阮兆祥、張美妮、楊明)
本來宣布演員陣容嘅時候,好多網民都表示好期待呢個配搭,覺得好新鮮。不過點知另一套黃金時間劇集竟然係《巨輪II》,入面竟然一樣有阮兆祥、張美妮同楊明,搞到網民話睇到精神分裂,懷疑無綫係咪咁冇人,仲有網民話懷疑呢套同《巨輪II》係咪姊妹劇添!

3. 膠味濃
呢套劇集負評多過好評嘅其中一個原因就係因為佢實在太膠!雖然無綫嘅喜劇一直都鍾意用爛gag,不過今次佢實在玩得太過份。有網民就話:「D攪笑橋段真係老到老夫子都唔用呀!」、「阮生啲爛gag真係垃圾,比小學生睇都唔會笑啦」。有網民就好精警咁總括咗呢套劇集嘅死因:

「編劇—低能當有趣, 白癡當幽默, 又係要演員扮小丑0既胡鬧劇
馬明—完全冇喜劇細胞, 點解仲要佢拍喜劇? 拍翻正經戲啦,唔該啲監製唔好再害佢喇
香香—不過不失
翠如—樣又串唔起, 演技又唔掂, 完全唔合格
祥仔—佢0既笑位好夾硬, 真係笑唔出」

4. 主題曲又係吳若希
雖然每次吳若希唱主題曲都一定會俾人鬧,不過今次竟然有網民「讚」佢!紛紛都話:「把咁嘅聲加上套劇咁無聊,又真係幾襯嘅!」雖然唔係真係讚,不過另一首由鍾嘉欣唱片尾曲就真係俾網民激讚啦!仲有網民話:「鍾嘉欣歌一出,收視唔DOUBLE都1.5啦!

唔係淨係彈嘅,套劇都有讚

5. 阮兆祥幾好笑同江欣燕很合拍
一向都善於做喜劇嘅祥仔一向都有喜感,亦好有觀眾緣。而今次拍埋江欣燕到就俾網民讚話佢哋好有火花,戲劇效果好好!而佢今次飾演真係堅有腦嘅「神探」,完全將淨係識得懶醒嘅馬明「神探」比下去,有網民就話佢完全搶晒馬明鏡,比馬明呢個男一更加似男一。

6. 樂瞳素顏演出
樂瞳喺劇中飾演面上有幾點汗斑嘅鹹魚妹小蓮,雖然出鏡唔多,最後仲俾張美妮殺死。不過好多網民都表示估唔到佢願意放低靚女形象去飾演醜角,大讚佢勇於嘗試,期待佢下次嘅演出。

唔知大家又對《為食神探》有啲咩評價呢?