為父戰勝情緒病 何雁詩揮桿追奧運夢

東方日報
曾打亞運的何雁詩去年復出打Golf,望能再代表香港出賽。

今日飛新加坡參加高爾夫球賽的歌手何雁詩,昨晚提前與爸爸食飯慶祝父親節,一家三口日前更接受本報專訪,大談父女情,何雁詩更爆爸爸鍾意男友鄭俊弘多過自己。

何雁詩日前與爸爸接受本報專訪,何媽媽帶愛犬陪伴,但怕醜拒絕上鏡。談到何爸爸最難忘的父親節,阿詩在旁偷笑說:「大鑊嘞!考起佢!」何爸爸笑言最重要一家人齊齊整整:「佢有時畫張卡,有時話爭住先,爭爭吓就唔記得咗。」

何雁詩在爸爸培養下,六歲開始打高爾夫球,不但變成「親子活動」,更是一門三傑:「其實媽媽打得最叻,佢最近贏咗個比賽。」八年前阿詩曾代表香港打亞運,去年強勢復出的她,在香港女子業餘錦標賽封后,在何爸爸心目中女兒很有水準:「我個女唔差(o架),希望佢可以有機會打奧運。」阿詩坦言距離這個目標還有很遠的路。

習慣高壓生活

阿詩憶述早年患情緒病時,爸爸曾憂心得衝入其房間喊着說:「你老竇得你一粒女,我真係好擔心你。」令她決意要好起來:「爹哋好少喊,好少喺人面前表露佢嘅情緒,嗰刻我就提自己要好起嚟。」何爸爸坦言父母當然望子成龍,亦可能因而給予女兒壓力,但阿詩卻表示自小已習慣了這生活模式:「我好記得爹哋講,你一係唔好打,一打就要打到最好,所以我希望樣樣都做到最好。」

口水佬啱嘴形

阿詩與鄭俊弘(Fred)拍拖兩年,曾有傳何爸爸不鍾意Fred,他親口否認,表示從不會對女兒交友有任何意見:「因為我唔知佢嚟真定嚟假,到佢哋話真係拍拖,我就擘大對眼睇吓,呢個男仔都幾好,好尊重長輩老人家,幾孝順。」阿詩笑爹哋鍾意Fred多過自己:「佢哋好多嘢傾,兩個口水佬。」何爸爸表示不會催女兒結婚,而阿詩坦言將來有小朋友,最想由爹哋親自教打Golf。

場地:園藝高爾夫中心

何爸爸視女兒為掌上明珠,千依百順。
鄭俊弘投其所好,成功入屋。