為救收視 奧斯卡廣告時間頒幕後獎惹非議

為咗收視你可以去到幾盡?講緊即將舉行第91屆奧斯卡金像獎頒獎典禮,今屆奧斯卡可謂風波不斷,Kevin Hart因10年前恐同言論被挖出而辭演主持人一職,風頭火勢下難以搵過個頂上,結果成為首次無主持人嘅頒獎禮!

而家又為咗嚴格控制節目流程於3小時內完成,要限制得獎感言時間。每個得獎人只有90秒時間行上台兼致辭,即係你行得慢、坐得遠就要講少2句;如果要同隔離位握下手、攬下的話,分分鐘無得開口,硬跳去下一個環節!

奧斯卡仲有個傳統,就係最佳男女主角同最佳男女配角4個大獎﹐會由上屆得主做頒獎人(男頒女女頒男)。不過呢個傳統今年好似會無埋,上屆憑《冰之驕女》入面個mean爆阿媽贏得最佳女配角嘅Allison Janney 就此安排公開發文表示唔多開心,大會就補鑊話Allison會擔任頒獎嘉賓,不過就無講實係咪頒返最佳男配角呢項。

咁都未算,最大爭議應該係將最佳攝影、最佳剪接、最佳髮型化妝同最佳短片(live action short)等4個獎項放落廣告時間頒,守住直播都唔會睇到,要睇返邊個得獎同佢地嘅得獎感言就要上大會官網睇!

獎項都係一種認可同肯定,咁安排都幾唔尊重班幕後人員,上屆最佳電影《忘形水》導演Guillermo del Toro有份炮轟大會安排失當,話哂剪接攝影化妝都係一部電影嘅靈魂,無理由重點去哂幕前星光度,最佳短片更係一隊人嘅努力,咁大細超好唔公平!

計我話節目短咗都未必救到收視,上屆頒獎禮全長3小時53分鐘,收視歷年最低,美國本土得2600萬人收睇,同最高收視1998年果屆差足一倍(該年錄得5700萬人收睇,大贏家係《鐵達尼號》),但2屆節目時間只係差6分鐘!

唔講咁遠,2014年由Ellen Degneres主持果屆長3小時34分鐘,同上屆差19分鐘,有4300萬人收睇,佢同班星嘅自拍相喺twitter破紀錄勁瘋傳!收視應該關個show好唔好睇事,多過幾長囉。

其實今年美國超級碗賽事、艾美獎等等都錄得低收視,部份原因係觀眾習慣有變,電視唔再係主要娛樂,節目隨時可以上網重溫,無必要死守電視直播。奧斯卡作為大型電影盛事,除咗個收視,肯定作品嘅質素、同業嘅付出及努力都同樣重要。

今屆無主持人,靠頒獎嘉賓讀稿,又唔俾得獎人講太多感言,未睇已經覺得悶,仲要直播cut走幾個獎,得罪埋班同業,今屆奧斯卡收視應該凍過水。