為復出拍《多功能老婆》黃錦燊「除牌」放棄大律師工作

《多功能老婆》劇照

無綫台慶劇《多功能老婆》正在熱播中,劇集除咗搵咗闊別劇集多年嘅楊千嬅之外,仲有多年冇見嘅上等人「貓屎」黃錦燊(Malvin)。現年70歲嘅佢,多年嚟以fit爆身型及超紳士外表吸晴,當年更係風摩萬千少女嘅筍盤。不過好多人知道佢一早已經俾香港知名演員趙雅芝私有化,二人1984年於美國結婚,更育有一子黃愷傑。

今次黃錦燊參演《多功能老婆》,喺劇中飾演周柏豪爸爸榮聲隆,係一名著名大律師,不過就經常俾個仔激得死去活來,佢哋火星撞地球咁產生唔少笑料,令人都好期待睇到呢一對趣味性父子。另外,黃錦燊今次於劇中與苗可秀係舊情人關係。

《多功能老婆》劇照
《多功能老婆》劇照

黃錦燊嘅演藝事業早於90年代結束一段時間,《真情》可以話係佢嘅告別作。2001年嘅,佢亦有為《廉政追擊》拍攝,不過之後真係好少可以喺螢幕前見到佢。原來佢喺1996年開始讀法律,讀咗三年就完成法學學士課程,更成功取得大律師資格。大好前途在手,就緊係踏入大律師之路啦!除咗係大律師及演員,佢仲非常熱愛化學,所以喺美國加洲大學讀取藥劑學博士學位,畢業後更擔任藥劑師。所以佢由細到大都可以話係一位才子。

其實大部份時間佢都係擔任大律師,直到2018年,佢受北上發展16年後回巢無綫嘅金牌編劇陳寶華邀請,希望佢可以參與拍攝劇集《多功能老婆》。佢哋曾經喺《真情》合作過,今次劇本又吸引到佢,加上黃錦燊又覺得角色非常適合自己,所以佢就向香港大律師公會暫時除牌,專心拍劇集。而今次參與完《多功能老婆》後,黃錦燊就話會開始接觸電影幕後工作,會編寫電影劇本。