滕麗名肋骨下移長期戴腰封

東方日報
袁文傑與滕麗名於劇中飾演情侶,受訪時頻頻打情罵俏。

藝人滕麗名去年滑雪時跌斷筋骨,至今仍未完全康復,早前更發現其中一條肋骨又再「跌落嚟」,要長期戴腰封「保命」,擔心受傷部位太耐冇郁動,引致肌肉萎縮。

滕麗名、袁文傑、呂慧儀、周嘉洛及吳偉豪等,昨日代表處境劇《愛.回家之開心速遞》參與捐血活動,袁文傑即場捐血,血型屬AB的他被阿滕笑自私,事關他可接受其他血型捐贈,但不能「回饋」他人。

冇通知老公

血型屬O+的阿滕適合捐贈不同人士,她透露有定期捐血助人,不過由於早前受傷,要服用強勁止痛藥,至今不足半年,故仍未能捐血。談到去年她到日本滑雪,不慎跌斷左邊5條肋骨,她坦言傷勢仍未痊愈,早前照X光,竟發現其中一條又再「跌落嚟」,現時要長期戴腰封固定位置,睡覺亦不敢脫掉,很擔心受傷肌肉長久未有郁動而萎縮。

問到丈夫是否很擔心?她直言:「我真係唔知幾時發生(肋骨下移)!冇話畀老公知,佢又唔睇新聞,不過佢都冇我符,我照樣去行山,佢話今次受傷,仲慘過生咗個女呀!」

袁文傑險盲

至於袁文傑自爆「出血」瘀事:「細個嗰時去踢波,仆咗落啲石地度,以為只係擦傷,點知原來就快見骨。踢完波,有警察問我咩事,我話冇嘢,但已經流到成身血。」又稱試過拍劇時,不慎被錘仔擊中眉心,但當時趕戲,止血後補粉再拍:「應該咁諗,其實已經好好彩,如果歪少少就打落眼度,後果不堪設想呀!」

呂慧儀呼籲大家定期捐血。
眾人於活動上合力炮製奶昔。