溫碧霞碌落樓梯受傷

東方日報
溫碧霞自爆拍戲受傷,手上仍有瘀痕。

女星溫碧霞、胡曦文、名媛何倍倩等昨晚出席活動,溫碧霞自爆前日拍電影時不幸受傷,現時腰部仍有少許痛:「嗰場戲講我着住高踭鞋落四、五級樓梯,但唔小心跌落嚟,碌咗三、四級,好在有人扶住我,不過腰、手同腳撞瘀咗。(保護塊面先?)都有,完全唔知道痛,我堅持繼續拍,工作人員話我好硬淨。」她表示老公何祖光有慰問,更細心幫她捽跌打藥膏,但因工作太忙,要母親節過後才去睇醫生。

胡曦文延遲結婚計劃

而胡曦文表示將在法國推出新手錶、首飾及化妝品:「暫時香港未有,仲計劃緊。(咁忙另一半投訴?)冇,男朋友都好少見。(有結婚計劃?)要延遲,等大家努力工作多一陣先。」至於何倍倩透露正籌備有關區塊鏈科技的App,將在九月推出,並即將到美國南加州大學讀博士課程。