溫碧霞尷尬咀女:幾舒服!

東方日報
溫碧霞笑指與陳漢娜拍咀戲時忍不住笑。

溫碧霞將於7月底生日,獲英皇老闆楊受成及電影台前幕後為她預祝,而新片中,她表示與女拍檔陳漢娜有親嘴戲,雖然尷尬但又感覺舒服。

藝人溫碧霞、關智斌、陳煒及陳漢娜等前晚出席英皇電影《墮落花》煞科飯局,英皇集團老闆楊受成亦有到場,為台前幕後打氣。席間大會推出蛋糕,為月底生日的溫碧霞提前慶生,令她相當驚喜,她說:「係今年首個生日蛋糕,生日嘅時候我會去美國探屋企人,同埋陪囝囝放暑假,會逗留十幾日,返嚟就要準備開拍下一套電影。」談到今次演出,她於片中接受演技大挑戰,其中包括與陳漢娜有親嘴戲:「估唔到錫女仔都幾舒服,不過拍攝嘅時候我哋有少少尷尬,兩個都忍唔住笑,場戲應該幾感動。」

關智斌睇騷賺贊助

另外,近日工作繁忙的關智斌(Kenny)略顯疲態,他說:「依家同黃宗澤、吳卓羲拍新劇,一收工就趕過嚟,只係瞓咗兩粒鐘。」問到是否正式「重返」香港娛樂圈?他說:「估唔到會有第二春,我去內地發展咗四、五年,返嚟做張敬軒演唱會嘉賓,跟住劇集電影同廣告都開始有Job,咁咪留低囉!」

說到9月14日與舊拍檔張致恒於紅館開演唱會,他表示很緊張:「暫定一場。收到消息嗰日,我咁啱搭飛機去巴黎,全程都好亢奮。」而首次獲品牌邀請出席巴黎時裝周的他,自覺眼界大開:「話晒我唔係潮人,今次用咗有限英文同啲設計師溝通,佢哋好好,知道我開演唱會,話會贊助服飾。(贊助埋張致恒?)唔會漏咗佢。(叫佢積極減肥?)我冇呢個能力,交畀你哋(記者)喇!」

關智斌為溫碧霞預祝生日。
楊受成現身煞科飯局為台前幕後打氣。