湯洛雯新年信邪最怕「鞋鞋」聲

東方日報
雖然大個女,湯洛雯依然愛(豆)利是。

身為圍村人的湯洛雯(靚湯)恭祝各位粉絲鼠年行大運!她表示兒時每逢新春佳節,圍村內外均非常熱鬧:「我喺圍村住到十幾歲,先同家人由大埔搬出九龍。圍村新年真係好多習俗,例如年卅晚踏入子時(11時)前要沖涼,初一婆婆會煮九大簋,親戚拜年聚會搞足成個晏晝,小朋友最開心梗係周圍(豆)利是啦。(最勁收到幾多錢?)5位數,交晒畀媽咪儲。」

而她在英國求學時期,春節會去唐人街「打躉」﹕「雖然氣氛唔及香港,但試過同啲同學走堂去飲茶,如果畀媽咪知一定鬧到癲!」外表時尚的她原來非常傳統,例如新正頭不洗頭、不買鞋:「有年有贊助商送鞋畀我,我話依家唔接得呀!」

湯洛雯思想傳統,新正頭必定唔洗頭。