湊孖女頭痕!熊黛林聞追仔色變

東方日報
熊黛林

名模熊黛林(Lynn)昨日在港出席二手衣物店開幕活動,透露一對孖女Kaylor與Lyvia四個月大已懂得叫爸爸媽媽,現時家姐不時講「打打打」:「其實唔知佢講乜!佢兩個喺屋企好嘈,下星期就九個月大,依家扶住啲嘢學行。」問到會否追對孖仔?她即驚訝說:「吓……唔好啦!(老公冇話想追仔?)大家傾偈時佢有提過想要仔,但唔係孖!湊孖女真係太辛苦,好似上星期佢兩個發燒同肚屙,我晚晚起身,但都瞓得唔安樂。」

談到前度郭富城將再做爸爸,問Lynn有否恭喜對方?她一臉尷尬:「恭喜佢。」問到會否考慮送衫仔畀對方?她又勁尷尬說:「唔好再問我啦!有少少為難我啦!」同場的名模歐陽妙芝透露家中收埋很多衫,部分更是全新未着過:「真係要反省吓!」