游水比賽受傷入院 39歲方力申:人生谷底

游水比賽受傷入院 39歲方力申:人生谷底

藝人方力申(Alex)今日喺社交網自爆參加完一項比賽之後,因眼部不適要入醫院,佢拍片向大家報平安說:「我衝線時拎起過泳鏡睇嘢,咁可能嗰陣有嘢入咗眼,上咗水就好腫,係咁流眼水,之後我懷疑有嘢喺眼入面,所以嚟醫院睇。」佢話經過醫生檢查睇唔到有嘢係入面,但就發現微絲血管腫得好勁:「我依家擘大眼覺得有嘢頂住,醫生話會有強力啲嘅眼藥水畀我,等我舒服啲。」最後連關智斌演唱會佢話去唔到,但仍然好有心送上花籃支持對方,而蔡卓妍、陳瀅及劉浩龍等,都叫佢要好好休息。

事後東網記者搵到小方,佢接受訪問表示已看完醫生回家休息中,多謝大家關心,至於眼部受傷經過,他指今朝參加一個「THE POLSON 5」公開游泳比賽,由赤柱碼頭游到淺水灣,全程為五公里,他以1時14分完成賽事,他說:「醫生洗完眼後,畀咗藥我食,周一或者返醫院覆診。」

好大壓力

小方雖然眼傷不嚴重,但似乎傷了心,自言近期好黑仔:「今早參加20歲至39歲嘅比賽組別,其實我15年前都參加過,今次我得第三名,唔係咁滿意成績,冠軍係20歲嘅Sunny。(成績好好啦。)唔係呀,之前練水嘔完,覺得狀態都唔係咁好,我今朝游完,睇返個組別年齡自己都笑咗,我20歲嗰年時,喺我游水最光輝時期,依家39歲,我覺得係我最谷底。(會唔會影響你之後環島游嘅士氣?)都會㗎,我依家諗都係唔好計時間,覺得好大壓力,比我做運動員更大,因為好多人知,頭先睇醫生,醫生都問我之前喺咪嘔,又有個後生仔鼓勵我,覺得我呢個環島係唔容易嘅。」問他可會休息幾日暫不練水?他稱:「本來聽日去游鹹水,但唔去啦。(去游泳池?)視乎情況啦,或者休息幾日先。」