港姐衝出香港去澳門取景 酒店門口留倩影被網民嘲笑似桑拿廣告

《香港小姐競選》係香港一年一度嘅選美盛事,過往曾經去過葡萄牙里斯本、美國邁阿密、非洲肯亞及英國倫敦等地進行外景拍攝。近幾屆已經開始「縮皮」越去越近,好似福岡、東京及台北,但估唔到今屆係喺香港嘅西貢取景,唔少人聽到都忍唔住取笑,就連獎門人曾志偉都誤以為係越南嘅西貢。

去到前日,香港小姐終於衝出香港,唔知係唔係擔心今屆佳麗們太過操勞,所以就去近近哋去澳門漁人碼頭同埋勁有歐洲風情嘅羅馬競技場(唔係意大利呀~)取景。網民已經笑爆留言問點解唔去深圳嘅世界之窗,嗰度一日就可以環遊世界。

之後,佢哋仲去埋行路唔使5分鐘嘅勵宮酒店,大會安排佳麗們喺酒店門口擺甫士影相。相片公開後,唔少網民都好疑惑點解大會要佳麗喺酒店門口留倩影,因為感覺非常庸俗,有網民更加以為係惡搞圖。更有網民搞笑咁話似桑拿或者係夜總會廣告:「下次去麻雀館啦,個度夠晒香港文化」、「d裙同間酒店想點」、「差個號牌」、「無傳統美,亦無國際美,娘味滿瀉」、「真係似桑拿廣告」及「唔知以為夜總會揀女」等等。