港姐王菲冇錢畀家用

東方日報
王菲養到自己,但畀家用就有啲手緊!

香港小姐冠軍黃嘉雯、亞軍王菲與季軍古佩玲,昨日在將軍澳電視城出席明珠台《絕色星期二:野性風之島》記者會。講到當選港姐後,受社會動盪影響而零商演沒收入?黃嘉雯說:「依家忙緊台慶同埋慈善工作,唔係零收入,我哋有底薪。」但她承認入不敷支,要「食老本」:「入行前有工作,依家要攞啲積蓄嚟用。(生活有冇困難?)咁又冇,希望可以盡快習慣新嘅生活模式。(冇工作,成日陪住男友?)唔係成日黐住男朋友,我都有約朋友嘅。」

等機會發圍

講到落選港姐蔡嘉欣發展反而更好,已有機會主持節目,黃嘉雯說:「戥佢開心,佢係叻女嚟。相信完咗呢年嘅港姐義務工作,好快會有機會。(唔攞獎好過攞獎?)唔會,獎項係榮譽嚟,同埋有獎金㗎!(獎金可以使到幾時?)呢啲豐儉由人。(出入慳家搭地鐵?)搭公共交通工具環保嘛。」

男友做埋柴可夫

王菲亦被問到是否有經濟壓力,她說:「冇,自己使OK嘅,只係畀唔到家用,不過屋企人好體諒。(男友支持?)咁又唔使,佢得閒請吓我食飯、車吓我。」至於古佩玲選港姐時仍是大學生,得獎入行後首嘗出糧的喜悅,她說:「讀大學都未試過自己賺錢,第一次賺到錢好有成就感!呢個係第一步,希望將來都係靠自己努力賺錢。」

三位港姐與幾位主持一同宣傳節目。
戴祖儀戴上公仔頭飾賣萌。