海魔/風獅爺/林朗生/姜子優 細數上半年令人印象深刻無綫劇集角色

今年眨吓眼就已經過咗半年,當中唔少演員將劇集角色發揮得淋漓盡致,令觀眾留下深刻印象,成功入屋。今日就同大家重溫一下,唔知大家又同唔同意呢?

《降魔的2.0》海魔Thalassa(譚凱琪飾)

譚凱琪(Zoie)樣子可愛甜美,今次喺劇中一人分飾多角,以經常飲醉酒嘅的士乘客阿花、古代降魔人妻子允瑩及大反派海魔Thalassa演出,又時裝又古裝造型,被網民封為「最美分派」。除咗造型吸引網民之外,戲份唔輕嘅佢成功將幾個角色嘅性格同行為完美演繹,演技備受肯定,證明佢係有外型有演技。

《降魔的2.0》海魔Thalassa(譚凱琪飾)

《降魔的2.0》風獅爺(C君飾)

C君喺劇中飾演石精靈風獅爺,平時為人好色,好鍾意偷窺女仔裙底,最後因為芷若(黃智雯飾)而協助小馬(馬國明飾)解決降魔疑難。不過最爆嘅都係C君一出場就要裸露示人。今次C君喺劇中表現生動盞鬼,佢嘅口頭禪更深受小朋友喜愛,紛紛模仿佢講「你爺爺我...」。《

《降魔的2.0》風獅爺(C君飾)

《十八年後的終極告白》林朗生(譚俊彥飾)

譚俊彥喺劇中身為男一飾演會計師林朗生Sam,因為18年前與一班朋友埋屍後,佢就努力發奮,仲成為一個忠忠直直嘅會計師。不過骸骨最終被意外發現,佢就做出一錯再錯事情,「黑化」後嘅Sam,為掩飾秘密,不惜大話冚大話,最後仲錯手將好朋友阿一殺死。譚俊彥將劇中角色發揮得淋漓盡致,網民仲話佢做得好好及眼神表情交到戲,今次佢可以話為自己「收視毒藥」呢個稱號作出平反。

《十八年後的終極告白》林朗生(譚俊彥飾)

《十八年後的終極告白》謝家倩(楊秀惠飾)

楊秀惠喺劇中飾演聾啞人士謝家倩,佢喺拍攝過程要記大量手語,同時眼神同表情又要配合手語,所以可以話係相當之有難度。喺劇中佢排除萬難終於同阿一成為情侶,不過可惜無法終老。有唔少慘情喊戲嘅楊秀惠,今次獲觀眾大讚,成功搣甩「花瓶」形象。

《十八年後的終極告白》謝家倩(楊秀惠飾)

《十八年後的終極告白》趙玉娣(尹詩沛飾)

尹詩沛喺劇中飾演「豬肉婆」Tiger嫂趙玉娣,佢表面好惡好霸道,仲成日鬧老公Tiger(杜大偉飾),大家原本都覺得呢個老婆好難頂,但實際佢其實係好愛Tiger。佢每一次出場都令觀眾留下深刻印象,尤其係喺豬肉檔嗰場爆喊戲,真係睇到大家心都噏埋。

《十八年後的終極告白》趙玉娣(尹詩沛飾)

《那些我愛過的人》姜子優(蘇皓兒飾)

「新一代氣質女神」蘇皓兒(Chloe),前女子組合As One成員之一,喺劇中飾演姜煜誠(林文龍飾)女兒姜子優,兩父女相依為命,感情方面就會周旋喺朱嘉炳(顧定軒飾)及Eden(李任燊飾)之間。雖然Chloe已經26歲,不過演中學生仍然青春逼人,成功憑角色入屋,獲得網民關注。

《那些我愛過的人》姜子優(蘇皓兒飾)

《機場特警》李至安(何依婷飾)

何依婷憑甜美笑容成為無綫新一代女神,今次《機場特警》係佢第一次拍劇,佢喺劇中飾演空姐兼網紅李至安(安安),同時亦係馬容義Easy(楊明飾)嘅女朋友。何依婷除咗演技亮眼之外,佢仲有大膽演出,例如要對手楊明摸大髀及要著比堅尼洗車。唔少網民睇完之後都大讚何依婷表現自然,係可造之才。

《機場特警》李至安(何依婷飾)

《法證先鋒IV》鄒浩(楊潮凱飾)

楊潮凱喺劇中「水泥童骨案」單元飾演智商只有6歲嘅低智人士鄒浩,講佢同媽媽蘭姨(黎燕珊飾)失散23年後重逢,不過意外捲入一宗藏屍案。唔少人睇完佢嘅演出後都大讚佢將角色發揮得淋漓盡致,俾佢同黎燕珊嘅母子情所感動。楊潮凱無論外型及演技都要花上好多心思去練習,大家都睇到佢逐漸成熟,今次喺劇中的確有大突破!

《法證先鋒IV》鄒浩(楊潮凱飾)

《黃金有罪》莫莉莉(劉芷希飾)

劉芷希喺劇中飾演夜總會紅牌舞女莫莉莉,暗戀錢永進(蕭正楠飾),佢有唔少場口都需要性感衣着登場,當中包括喺沙灘以紅色比堅尼泳裝上陣,憑着火辣辣的身材,成功吸引網民關注,人氣急升。

《黃金有罪》莫莉莉(劉芷希飾)

《大醬園》葉細么(龔嘉欣飾)

龔嘉欣喺劇中飾演大奸角葉細么,由最初同夏小滿(朱晨麗飾)係好姊妹,及後齊齊做醬園學徒,到後期盲目追求名利。心機算盡嘅佢不惜一切成為專員(袁文傑飾)太太,往後更心狠手辣殺人,其中有一幕報仇殺曾經強姦自己嘅劉星威(阮政峰飾),神情眼神簡直令人毛骨悚然。呢套劇集可以話係龔嘉欣嘅代表作之一。

《大醬園》細么(龔嘉欣飾)