海俊傑感恩獲黎小田賞識

東方日報
海俊傑感激黎小田悉心栽培。

「全能音樂人」黎小田(Michael)前日病逝,歌手海俊傑昨日重提與這位前輩的相處點滴:「Uncle Michael係爸爸舊同學,我16歲時第一次喺唱片公司見面,佢叫我唱首歌畀佢聽,仲用鋼琴幫我伴奏。佢聽我唱譚詠麟首《幻影》後讚我唱得唔錯,仲問我有冇興趣拍電影,但佢聽到我就快移民美國,個樣唔知好嬲定好笑。我諗佢係嬲嘅,但叫我第時返香港記得搵佢。」他指事隔多年後回流,並參加新秀歌唱比賽奪冠及簽約華星做歌手,雖然Michael當年已離開華星,但雙方仍有機會合作,他說:「我好珍惜同Uncle Michael一齊嘅時光,因為佢教咗我好多人生道理,好感激佢。」

另外,無綫為悼念一代音樂奇才,製作《創造經典 永遠懷念音樂巨匠黎小田》特備節目,將於12月8日晚上10時30分至11時30分播出。