浪漫經典 《人鬼情未了》情牽28年

「Oh my love ~ my darling ~ I hunger for your touch~ 」咩叫經典?就係首Unchained Melody一出即時有畫面仲講得出套戲名!28年前嘅7月13日,《人鬼情未了》(Ghost)喺美國上映,一幕搓陶瓷戲堪稱浪漫經典!

《人鬼情未了》故事講述俊男Patrick(由Sam Wheat飾演)同美女Molly(Demi Moore飾)相戀並準備結婚,有一晚返家途中Patrick遇上劫匪,不幸中槍身亡。其實佢嘅死唔係意外,而係佢朋友為左謀財而動殺機!雖然Patrick肉身不在,但靈魂因為不捨女友繼續守候身旁,仲通過靈媒幫手傳話,努力保護女友,直至真兇被緝拿歸案。

故事有愛情有奇幻仲有懸疑,集所有大賣元素於一身,結果全球大收5億美元票房!受歡迎之餘仲獲獎無數,《人鬼情未了》獲奧斯卡最佳原著劇本,其中飾演靈媒嘅 Whoopi Goldberg獲得奧斯卡最佳女配角。

香港觀眾對搓陶瓷一幕特別有親切感,因為你可能無睇過《人鬼情未了》,但點都有睇過下92年《家有囍事》啩?何里玉(張曼玉飾演)咁鍾意睇戲,唔同常歡(周星馳飾演)玩返幕搓泥又邊有得「巴黎鐵塔反轉再反轉」?

好劇本經得起時間考驗,不過就好難超越。2010年日本翻拍左《人鬼情未了》,女主角 Molly 由日劇女王松嶋菜菜子飾演,男友由韓國型男宋承憲飾演,故事有唔少改動,變成女主角因車禍身亡而非被謀殺,一樣有搵靈媒(樹木希林飾)幫手傳話,但多左個小女鬼(蘆田愛菜飾)教菜菜子如何做鬼保護男友宋承憲。可能原作太經典,事隔多年改編,坊間普遍反應都係麻麻!