【浪漫情人節】細數無綫近10年拍劇撻著夫婦

聽日就係一年一度嘅情人節,相信大家平時都睇唔少藝人喺社交網站放閃,其實近年都有唔少男女藝人,因為拍劇而認識,繼而拍拖結婚。趁住呢個咁甜蜜嘅日子,我哋就同大家數下呢10年有邊對夫妻因拍劇而撻著啦!

鄭嘉穎 & 陳凱琳

2013年香港小姐冠軍陳凱琳(Grace),加入無綫後隨即獲力捧上位,可惜佢嘅演技一直被外界批評。佢同鄭嘉穎因拍攝劇集《殭》認識兼撻着,佢哋年齡相差22歲,戀情開始時不被外界睇好,最終修成正果喺2018年於印尼峇里舉行婚禮。喺上年,佢哋更誕下囝囝Rafael,一家三口幸福美滿。

羅仲謙 & 楊怡

姊弟戀都可以好幸福,雖然楊怡比羅仲謙年長5年,不過佢哋拍拖至今就相當甜蜜。兩人喺2012年拍攝劇集《On Call 36小時》而撻着,拍拖4年終步入教堂拉埋天窗。喺今日,羅仲謙同楊怡分別喺社交網站宣布造人成功,喜訊出街後,唔少網民都紛紛留言恭喜佢哋。

蕭正楠 & 黃翠如

蕭正楠同黃翠如喺拍攝劇集《師奶MADAM》時朝夕相處而戲假情真,直至14年5月佢哋將戀情公開,之後仲越愛越高調,不時公開打情罵俏,真係羨慕死人呀!喺拍拖期間,佢哋一直被外界睇好,仲多次傳出婚訊。喺前年年尾嘅《萬千星輝頒獎典禮》中,蕭正楠憑與曹永廉拍檔嘅節目《兄弟大茶飯》獲獎,喺講得獎感受時突然宣布佢哋已婚嘅消息,震驚整個娛樂圈。喺上年5月,佢哋仲喺峇里島補辦咗一場好浪漫嘅婚禮。婚後二人一直放閃,係娛樂圈公認嘅一對幸福夫妻。

陳豪 & 陳茵薇

2006年港姐冠軍陳茵媺(Aimee),加入無綫後參與唔少劇集拍攝,佢同陳豪喺2010年拍攝劇集《心戰》時撻着。拍拖2年後,佢哋喺巴黎結婚。婚後陳豪繼努力拍劇及打理自家品牌咖啡生意,而Aimee就減產,專心相夫教子。佢哋婚後三年抱三,誕下2位寶貝仔及1位千金,一家五口幸福美滿。

王浩信 & 陳自瑤

王浩信(Vincent)同陳自瑤(Yoyo)喺08年因劇集《野蠻奶奶大戰戈師奶》邂逅,雖然佢哋喺劇中冇對手戲,不過就因出席唔同聚會而熟落。喺Vincent追Yoyo時,佢哋都會傾唔少拍劇嘅問題,,後來二人互生好感。喺拍拖3年後,佢哋喺2011年11月11日上午11時結婚,婚後育有一囡。

陳榮峻 & 吳香倫

無綫甘草演員陳榮峻與吳香倫,佢哋喺2010拍攝拍劇《怒火街頭》認識,直至14年陳榮峻走出喪妻傷痛,與吳香倫相戀。佢哋拍拖三年幾,喺仔女及朋友嘅見證及祝福下,黃昏戀修成正果,喺前年拉埋天窗。

楊證樺 & 沈可欣

無綫綠葉演員楊證樺與沈可欣,佢哋相識已經十幾年,仲經常喺劇集飾演夫妻。佢哋喺2014拍攝拍劇《再戰明天》時相戀,喺2015年決定喺現實生活中做「真夫妻」,實行戲內及戲外都係一對。婚後育有兩名可愛囝囝,一家四口樂也融融。


其實經典拍劇撻着夫妻仲有好多,例如苗僑偉與戚美珍、張家輝與關詠荷、劉青雲與郭藹明及梁朝偉與劉嘉玲等等㗎!