浪漫婚照曝光 陳山聰晒麒麟臂冧未來老婆

真係靚到嗌出聲。

藝人陳山聰將於11月1日迎娶拍拖5年多的女朋友Apple,早前,二人特別飛法國拍攝婚紗相,相中兩人有多個造型,面上流露出無限的幸福和快樂,山聰望住Apple的眼神簡直是甜到漏。山聰表示:「其實我同太太拍拖呢5年入面,我都冇為太太做過啲咩浪漫嘅事,依家終於要結婚喇,所以我好想帶佢去一個好浪漫嘅地方影相補數,希望畀到佢有個美好回憶。法國係一個我相信大部分女仔都會鍾意嘅地方,加上太太以往都未去過法國,所以好想同佢喺呢度,影一輯靚靚婚紗相,成為我同佢之間一個最美好同難忘嘅回憶。」

出盡人情牌慳都要貪靚

今次婚紗相,山聰出盡人情牌,獲不少好友相助,既慳錢又做到最佳、最滿意的效果。山聰說:「攝影師Frankie係幫袁偉豪影寫真嘅攝影師,亦係我哋嘅好朋友。化妝師同髮型師都係一向合作開嘅兄弟班,服裝方面,多得胡杏兒穿針引線,佢哋婚紗店送咗一套由老闆親自設計嘅婚紗,連裙上面嘅喱士都係由法國運返嚟做。大家都知我係貪靚鬼,我套禮服係買嘅,好彩有蘇永康同佢太太仗義幫忙,我先得到呢套好有型嘅禮服。」

美好回憶唔用錢衡量

山聰被問到婚禮的預算?山聰說:「呢個美好回憶係唔可以用錢去衡量,婚紗相出嚟嘅效果好滿意,只要係能力範圍內做到,一定要令太太開心,希望大家睇到都鍾意。」他表示11月1日的婚禮以簡單形式進行,最重要是家人同最好的朋友在場,與他們分享喜悅,就是最美好的一晚。