泰國少年山洞探險事件 片商火速取材拍電影

今日令人興奮嘅新聞,都係同重獲自由有關。一件係劉霞離開北京扺達德國,另一件就係被困山洞18日嘅泰國少年足球隊,全員12人連埋教練都安全脫險!

泰國少年足球隊獲救一事確實令人鼓舞,美國電影公司Pure Flix Entertainment剛剛宣佈,佢地會將事件拍成電影,最快可於2019年完成。世界太多問題,大家都好需要正能量事件,對人性建立返信心。呢個都可能係電影公司睇中故事嘅原因之一。

你以為電影公司無人性抽水為搵錢?咁又唔一定。Pure Flix Entertainment嘅合伙人Michael Scott向外娛媒體Variety透露,事發時正身處泰國,而佢嘅泰藉太太同因救援行動而遇難嘅泰國潛水員係兒時好友,對於他不幸遇險非常難過,所以每日關注事態發展,亦親身同有份參與救援工作的潛水隊員、少年足球隊家人溝通同了解行動進程,在場亦有好多義工來幫手,相信Scott喺現場深受大家團結無私嘅精神感動。

我估全世界都想知,佢地一行13人平均年齡未成年,喺未被救援隊伍發現前2星期究竟點過?中間佢地又經歷咗咩事?係無食物無光線嘅情況下,佢地心入面諗緊咩?少年們如何保持互助無互相傷害,一個都沒有少?唯一一個成年人嘅教練又係咩心情?暫時仲未聽到佢地自己親身解畫,不過單單呢部分已經劇力萬分,仲未計由一眾救援團隊嘅視點出發,驚險兼爭分奪秒嘅行動過程!

現實比故事更有戲,用唔同人嘅角度睇呢件事,可以將呢個題材變出幾部電影。希望荷里活各公司唔好搶住拍,將鼓舞人心嘅事變成無色無味為左哂特技嘅商業片啦。

頭先提及嘅Pure Flix Entertainment本來專拍福音電影,其中God’s not Dead系列出品最出名,已經拍左3集。拯救行動電影版會唔會因此多左好多宗教元素就言之尚早。不過,今次被困險境又大難不死,都真係一個奇蹟。