【法證先鋒IV】陳煒/黎燕珊/楊玉梅....究竟邊位前亞視女演員最好戲?

無綫熱播劇《法證先鋒IV》大獲好評,唔經唔覺就踏入結局篇,劇集雲集好戲之人,唔少仲係前亞視演員。既然劇集已經播出咗咁多集,大家又認為以下邊位前亞視女演員最好戲呢?

陳煒

陳煒(煒哥)喺劇中飾演科學鑑證主任「Queen姐」,係一個性格硬淨又事業心重嘅女人,原本有一個拍拖多年嘅男友Louis(鄭子誠飾),不過就被好姊妹Elaine(康華飾)脫衣獻身硬搶,一夜情有咗Louis嘅骨肉。正當Queen打算原諒Louis時,Louis就慘遭殺死。唔少人都大讚佢好戲,可以完美演繹知性有型嘅女強人,同埋表達到女人被好朋友及男友背叛嗰種痛。

黎燕珊

黎燕珊喺單元「水泥童骨案」中飾演尋親媽媽蘭姨,佢搵返失散廿幾年嘅智障兒子浩仔(楊潮凱飾)。黎燕珊喺多場母子戲都演得好出色,例如佢哋母子重逢、屋企溫馨對話及企圖跳樓自殺等等,唔少觀眾都話睇到眼濕濕。

謝雪心

謝雪心(心姐)喺劇中飾演患有初期認知障礙症嘅「馬姐」秋姐,為咗演活角色,佢仲自創口音及帶假肚腩。喺知道患病後,心姐演內心掙扎、接受現實及哭訴驚忘記重要嘅事同人嗰個痛,真係做得好好。另外,佢同法醫Dr Man(李施嬅飾)嘅主僕情誼深厚,同樣深得觀眾喜愛。

楊玉梅

楊玉梅喺劇中單元「二次溺斃案」飾演虎媽潘卓菲,佢個女穎芝橫屍引水道。佢喺劇中飾演嘅怪獸家長,表面上為個女好,但其實唔知個女想要咩,最後仲間接害死咗自己個女。佢有多場喊戲都演得十分精彩,當中包括水渠旁認屍當場崩潰及醫院床上委屈咁喊,睇到觀眾心都酸埋。

鮑起靜

鮑起靜(鮑姐)今次係特別客串,佢喺劇中飾演一名為仔賣女嘅尋親媽媽芳姐,雖然只係短短10分鐘嘅戲份,但佢憶女嗰場戲真係非常精彩。呢段戲講述同名同姓嘅高善(許維恩飾)遇交通意外死亡,高安(黃浩然飾)同徐意(湯洛雯飾)就幫高善搵親生媽媽,之後芳姐就憶述當年賣女,表示非常後悔,仲開咗一間叫「家門咖啡」嘅cafe。佢由雙眼通紅到流出眼淚,觸動唔少觀眾嘅心,簡直係演技大爆發。

袁潔儀

袁潔儀喺劇中飾演King Sir(譚俊彥飾)家姐,當年老公喺颱風情況下,陪仲讀緊書嘅King Sir去追風,結果為咗救King Sir而被大浪捲走死亡,之後佢就要獨力撫養個女及細佬。早前劇情就講到佢同老公最後回憶嘅糖水舖,因為業主要加租關係,佢擔心捱唔到落去,所以聲淚俱下咁向King Sir大發脾氣,呢一幕真係睇到觀眾心都噏埋。

張文慈

張文慈喺單元「粵劇團兇殺案」中飾演龍映雪(米雪飾)嘅忠心助手張淑敏,望落斯斯文文嘅佢因為想幫雪姐出頭,而教唆殺死傷害雪姐嘅人。佢喺劇中演得非常到位,特別係喺口供房嗰一場戲,劇集出街後唔少網民都大讚佢好戲。