《法證先鋒IV》楊潮凱演活智障人士 獲網民大讚好戲:睇到喊

楊潮凱

無綫劇集《法證先鋒IV》正在熱播中,繼早前「真空袋藏屍案」後,最新輪到「水泥童骨案」接力。喺呢個單元中,楊潮凱飾演中度智障人士鄒浩,唔少人都大讚佢演得非常出色,睇得出無論外型及演技上都花咗唔少心機。噚晚就講到佢同媽媽蘭姨(黎燕珊飾)失散23年後重逢後,因為佢整到屋企污糟邋遢,搞到蘭姨好嬲同鬧佢,鄒浩傷心離家失蹤。之後,高安(黃浩然飾)陪蘭姨搵鄒浩,佢哋喺廢屋搵到鄒浩,兼意外揭發一宗藏屍案。另外,佢哋母子喺屋企及蘭姨暈倒嗰一幕,同樣睇到大家好感動。

35歲嘅楊潮凱入行11年,參與過多部劇集拍攝,較為人熟識嘅有《EU超時任務》、《天與地》、《使徒行者》及《鐵探》等等。劇集中經常有突破嘅佢,今次就扮演中度智障人士,佢完全將角色發揮得淋漓盡致。好多觀眾都大讚佢兩母子都演得超好,被佢哋母子情所感動,而楊潮凱做得相當出色,好大進步。網民們紛紛去佢社交網站留言讚佢,例如:「你啲演技真係好掂」、「你真係做得好好,連醫院瞓覺都好大戲,真係好似傻仔👍🏼」、「由頭到腳都係戲」、「第一次見你飾演呢種角色,已經做得好好,相信你一定花唔少時間去揣摩.繼續努力!加油!💪🏻💪🏻💪🏻」、「我睇到喊左出來,你真的做得好好!欣賞你,成為你的fans❤」及「你做得好好呀」等等。

《法證先鋒IV》截圖
《法證先鋒IV》截圖
《法證先鋒IV》截圖
《法證先鋒IV》截圖
《法證先鋒IV》截圖