《法證先鋒IV》後《機場特警》《十八年後的終極告白》緊接播出 有傳呢兩套劇5月接棒

《機場特警》劇照

無綫8點半及9點半黃金檔期正在播放《法證先鋒IV》及內地劇《慶餘年》,而大獲好評嘅《法證先鋒IV》喺今晚就會播出大結局,下星期緊接出街嘅就係由楊明﹑蔡思貝﹑張振朗、湯洛雯及鄧佩儀等人主演嘅《機場特警》。而由譚俊彥、陳山聰、黃智雯及楊秀惠等人主演嘅《十八年後的終極告白》就暫定緊接《慶餘年》喺4月中出街。《機場特警》同《十八年後的終極告白》都未正式出街,但噚日喺網上就已經傳出邊兩套劇會接佢哋棒播出。

喺噚日,網上討論區就有網民開PO指《降魔的2.0》及《飛虎之雷霆極戰》將分別被安排緊接《機場特警》同《十八年後的終極告白》喺5月4日及5月18日首播。

馬國明、黃智雯&譚嘉儀

2017年大熱劇集《降魔的》,雖然係低成本製作,但勝在題材吸引及演員用心演出,收視同口碑雙雙報捷,而無綫就喺上年年初拍攝續集《降魔的2.0》。續集除咗繼續有黃智雯、馬國明、劉佩玥、胡鴻鈞、蔣志光及謝雪心等原班人馬演出之外,仲會有C君、譚凱琪、鄧佩儀、麥凱程及羅天宇等新面孔加入劇組。

《飛虎之雷霆極戰》海報

《飛虎之雷霆極戰》由苗僑偉、黃宗澤、吳卓羲、馬國明及梁競徽等人主演,劇集以飛虎隊為題材,原定上年接《街坊財爺》播出,不過就因社會事件而暫時抽起。