《殺手》惹抄襲疑雲 網民讚打戲有電影感 龔嘉欣搶眼程度爆晒燈

《殺手》劇照

無綫重頭劇《殺手》以職業殺手為背景喺今個星期首播,搵黎強勁演員陣容有黎耀祥、陳豪、李佳芯、龔嘉欣、高海寧等主演,絕對值得花少少時間去睇。睇左幾集,睇下網民對依套劇有咩意見啦!

《殺手》涉嫌抄襲小說《殺手世界》

唔少網民認為《殺手》同本地作家孤泣小說《殺手世界》非常相似,特別係「殺手經理人」、「初代零號ZERO」和「殺手排行榜」, 作家孤泣就話2014年開始創作故事,亦冇將《殺手世界》嘅IP賣俾無綫,係唔係抄襲佢都唔知,因為佢冇睇呢套劇。

打鬥戲有電影感冇揸流攤

《殺手》中有好多打戲,大部份演員都係親身上陣,好似龔嘉欣就打到成身瘀晒,相當辛苦。相信辛苦都係值得嘅,因為唔少網民都大讚《殺手》打鬥戲充滿電影感。

《殺手》截圖劇照

角色形象鮮明

劇集每個角色都好形象鮮明,第一集黎耀祥係叱咤一時嘅殺手,好有型, 但之後因為一次意外家破人亡而變得市井。李佳芯(Ali)唔再係女神,而係一頭大曲髮、戴眼鏡嘅「師奶造型」,而江美儀就飾演妓女LuLu,劇中有百變造型,龔嘉欣就一改乖乖女造型,飾演女殺手,頭髮剷青、手臂紋身、性感背心再加上漁網襪。

《殺手》截圖

陳豪好型有獨特喜感

陳豪喺劇中飾演神級殺手喬星Zero,佢係市場上No.1殺手,不過佢個人都鍾意講笑同識女仔,總之唔似其他殺手咁COOL。喺噚晚嗰集,陳豪為咗救Ali,佢竟然可以一個打十幾個,不過就俾網民笑佢勁過葉問。

《殺手》截圖

龔嘉欣勁搶戲

龔嘉欣今次為劇集犧牲唔少,首先佢個角色造型少布又性感,仲被要求剷青,戲中又有大量打戲,由於造型關係佢未能加墊防護,淨係吊威也都搞到成身傷晒。唔少網民都留言讚佢:「有機爭視后」、「真心型,都覺得她辛苦,其他女角真是舒服多,又要打又要化濃妝。」、「我想睇龔嘉欣啊,最中意又顛,又cool,又靚嘅女瘋子。利申,哈莉係我最愛。」及「龔嘉欣好搶鏡!做得非常好」等等。

《殺手》截圖劇照

終於有得睇李佳芯Ali

因網上言論而被指表露政治取態嘅李佳芯(Ali),有傳佢因此被無綫雪藏,導致連續四劇被飛走,更有傳無綫本來決定放棄佢,但想喺放棄前試水溫,睇吓兩地觀眾對李佳芯嘅反應再決定。唔少網民仲話睇《殺手》,就係為咗睇Ali。另外,Ali嚟緊將會模仿龔嘉欣造型,以bra top加魚網衫現身,大家記得留意啦!

《殺手》截圖劇照
《殺手》劇照