歐鎧淳劈腿仲要扮情聖 胡子彤甩身講三句Thx

東方日報

新冠肺炎全球肆虐,人人自危,一心救港嘅堪輿學家李居明就親授口罩加持法,仲提議重播動畫片《龍珠》雙料抗疫,奇招係咪奏效?信不信由你!Nuts哥唔係導人迷信,但真心覺得事有湊巧,《龍珠》主角就係齊天大聖孫悟空,而肖猴嘅「港版美人魚」歐鎧淳就咁啱得咁橋,喺香港爆發疫情前已經飛咗去澳洲備戰東京奧運。家陣極爽皮嘅佢,日日着住件泳衣跳落水,無懼同隊友緊密接觸,最Free係唔使戴罩,享受久違嘅坦蕩蕩,自由又奔放,不過此罩係口罩個罩,巴打們唔好諗多咗!

生剝女神面罩

成功避過搶口罩、爭漂白水同撲廁紙嘅佢,避炎同做人一樣永遠快人一步,樣靚、家境好、學歷高,16歲就以香港游泳隊成員身份出戰北京、里約、倫敦同今屆東京奧運,27歲就榮登游泳女隊嘅首位奧運「四朝元老」,仲擸埋個「最靚持旗手」美譽。佢嘅超強人氣先最無敵,爆紅到喺電影《春嬌救志明》得嗰六句講咗等如冇講嘅對白,就有資格提名金像獎「最佳新演員」。恨入娛樂圈嘅姊妹們,既然同樣係着泳衣見人,如果嫌選美太Out、太悶,不妨諗諗學歐鎧淳踏跳板,或者彈得更高、更快。

《龍珠》入面嘅孫悟空最怕打針,但斷估歐鎧淳最淆底就係「篤灰」,Sell專一、又捱得,唔係「外貌協會」嘅佢,一單爆料就被生剝女神面罩,真心覺得呢個世代搞「SheShe情」唔係錯,但劈住腿扮情聖就係罪過,呢頭冧滋滋話同男友胡子彤慶祝,嗰頭就同籃球TB新歡倪碧賢影啜爆相,隔住個Mon都Feel到熊熊慾火,有圖有真相先焗認同胡子彤「有共識咁分開咗一段時間」,係咩?咁點解胡子彤唔係咁答嘅?

女尊男卑 「任人砌」

可憐胡子彤喺毫無預警下收咗頂綠帽做大禮,叫佢情何以堪,仲邊有面見人呢?不過諗深一層,其實「被分手」都有得着,原來絕境真係可以重生,睇番佢哋呢段畀人藐足三年嘅「女尊男卑」關係上,胡子彤一味飾演「任人砌」嘅角色,講句想搞鐵板燒餐廳,搵錢儲足老婆本就買樓成家啫,都畀人插等佢買樓結婚,不如等有層580萬天后單位嘅淳BB貼埋大床嫁佢仲快,最難堪係推薦佢演台灣殺人案疑犯陳同佳嘅角色,即係明笑佢好醜樣啫!

不過胡子彤自從飽嘗過男人眼中輸畀TB嘅奇恥大辱後,谷底反彈博番唔少同情分,家吓佢有拍劇,仲有網民掉轉槍頭,幫佢出氣鬧爆前女友「分手居然完全唔傷心,仲咁快同TB搞得咁開心,子彤加油!」嘩,有人戥佢唔抵喎,係咪要同歐鎧淳重複兼大大聲講三次「Thx」先?睇嚟都要喇!早散早享受,早排胡子彤喺社交網話:「你的左手準備給我牽嗎?」似乎已經走出情傷,開始肯拖吓其他人嘅手仔。之不過,正所謂「男左女右」,唔少網民話佢特別Highlight係左手,唔通佢想拖個比情敵似「女」嘅囝囝,證明自己一樣男女通殺?

Nuts哥

歐鎧淳同TB新歡打得火熱,可憐胡子彤要戴綠帽!