【機會嚟喇飛雲】細數上半年成功上位藝人

2019年話咁快已經過咗一半,當中有唔少藝人發展順利而人氣急升,仲成功上位入屋。今日就同大家重溫一下,唔知大家又同唔同意呢?

林秀怡

林秀怡

日前播完嘅無綫劇集《婚姻合伙人》口碑唔錯,相信唔少人都將注意力投放咗去女一高海寧身上,咁梗係啦! 佢有樣有身材喎!不過同劇仲有個同樣有樣有身材嘅「露髀」林秀怡(Kirby),喺劇中佢經常以低胸衫、熱褲或迷你裙造型出現,索爆OL造型,成功俘虜唔少男士啦! 而且今次仲要陸永飾演一對歡喜冤家,佢哋意外地有火花,令觀眾睇得舒服又開心。

陸永

陸永

陸永同樣憑劇集《婚姻合伙人》彈出,佢喺劇中繼續發揮搞笑本色,承包劇集大部份笑點。劇中扮演「自卑宅男」郎朝仁,成日都比人蝦同誤會,好似喺電梯被屈滅Kimchi(高海寧飾)屁股而食死貓。加上佢同林秀怡呢一對歡喜冤家,成功產生化學作用,比男女主角更搶鏡,唔少網民仲話期待陸永可以有更多演出。

程美段

程美段

同杜汶澤合作烹飪節目《為何深夜總是餓》,而引發拖糧事件嘅程美段(Kiwi),相信大家好有印象。呢位人氣急升嘅新一代「E Cup Baby」原名徐民虹,係中菲混血兒,初初出道做過model,曾經喺《美女廚房》擔任美女學徒,憑「一啖生蠔一啖蕉」一餸成功令人關注。佢成日都喺社交網站貼相派福利,身材火辣,仲試過影全裸照添!

《愛·回家之開心速遞》大四喜

《愛·回家之開心速遞》大四喜

聽到人講大四喜,可能大家會以為講打麻雀,咁你就錯啦!無綫處境劇《愛·回家之開心速遞》深受觀眾歡迎,係多個星期嘅收視冠軍,揮低唔少重頭劇。劇集經常有出人意表嘅暴走劇情,好似早前就有由75歲「熊樹根」劉丹、70歲「龍敢威」羅樂林、63歲「譚道德」陳榮峻同埋69歲「馬豹」黎彼得組成Hip Hop男團「大四喜」,佢哋喺劇中以一身Hip Hop造型出場,Rap得有板有眼。片段喺網上瘋傳,唔少網民仲要求佢哋出道做樂壇新人。

「火龍果」張敬軒

「火龍果」張敬軒

人氣勁爆嘅仲有「火龍果」張敬軒。話說早前師姐容祖兒推出20周年演唱會主題曲《Pretty Crazy》,MV仲邀請咗國團隊用舞蹈編排,點知身為祖兒好友嘅軒仔就化身樂壇新人「火龍果」,惡搞《Pretty Crazy》變《Pretty Hungry》,更玩起「low cost cosplay」添。連祖兒都忍唔住向軒仔個IG到留言:「何方妖孽,唔好再搞我好朋友,我軒仔以前好乖巧㗎……唔好講咁多啦,一於攞筷子嚟夾佢啲手指,燒啲符水佢飲吧啦。」

許雅婷

許雅婷

金庸小說《倚天屠龍記》再一次被改編成電視劇,而最新版本就係屬於內地版,劇集喺無綫啱啱播映完畢。今次呢個版本,香港代表除咗有周海媚同樊少皇之外,仲有飾演小昭嘅許雅婷(Kabby)。今年24歲嘅許雅婷係女子組合少女標本嘅成員之一。近年轉戰內地後,參與過唔少電影及電視劇集拍攝,今次喺飾演小昭大獲好評,更被封為「最索小昭」。