榴槤公主胡美貽逆市出擊4年變3間舖

東方日報
胡美貽食腦搞生意錢滾錢,話咁快就開到第三間舖!

擁34E豐滿上圍的胡美貽4年前獲爸爸打本100萬,食腦的她投資各樣生意極速吸金,並在馬來西亞買下30畝種有「貓山王」的榴槤地及在港開店。近期更人棄我取,她竟逆市連開兩間分店,25歲就有三間舖,靠賣榴槤致富,被封「榴槤公主」!

胡美貽(Nicole)參選2017年香港小姐入行,當時有「翻版朱千雪」之稱,之後她獲無綫安排主持節目《3日2夜》,憑着34E噴血上圍,加上活潑可愛的性格,近期人氣急升被起底,原來她出身富貴之家,父親營商,母親則是醫生!

馬國買30畝榴槤地

Nicole除了睇得、玩得外,亦非常有生意頭腦,修讀經濟學的她4年前獲爸爸打本100萬搞生意,她即發揮小宇宙,分散投資,當中包括賣珍珠奶茶、麻辣滷味、買股票及房地產等,錢滾錢下資金大增,故早年轉向較大型的投資項目,與友人合資700多萬,在馬來西亞彭亨州買下30畝榴槤地,大搞果王生意!她兩年前在尖沙咀開店,生意火紅,不少星級食客包括蕭正楠、曹永廉及陳婉衡等幫襯。

最近社會動盪,營商環境欠佳,不少食店相繼結業,Nicole卻對自己的生意充滿信心,更決定逆市投資繼續擴充業務,在元朗、澳門開分店。早前,她獨自到元朗舖視察裝修進度,因投資生意成為圈中小富婆的她身光頸靚,拿着名牌小手袋,見她穿吊帶背心襯短褲騷白滑美腿,吸引途人眼望望,但她一於少理,在店內仔細檢查,不時與師傅密密斟,更落手落腳烏身搬油漆。她之後再殺入街市榴槤檔了解行情,期間將果王逐個拿起研究及拍照,雖然攤販落力推銷,但本身已是榴槤田地主的她齋睇一輪就走人。

感激父母打本

Nicole今日能夠有田、有舖,被冠以「榴槤公主」稱號,她感激現時在美國居住的家人支持:「多謝父母,佢哋好識畀目標我,4年前畀100萬我留喺香港搞投資,講明唔會加碼,生活費亦要自己搞掂,等我唔好有依賴,當然如果搞唔掂,佢哋就會叫我返美國。依家叫做有啲成績,佢哋當然戥我高興!我會繼續努力,希望生意愈搞愈好,同埋想喺演藝界有多啲嘗試。」談到逆市投資勇氣可嘉,她笑說:「都唔係嘅,覺得只要捱過呢段時間,之後就會好。(有冇減租?)冇,都係差唔多。」

Nicole Profile

年齡:25

三圍:34E、23.5、35

入行經過:2017年香港小姐12強,其後報讀藝員訓練班,2018年成為無綫旗下藝人。

演出作品:《BB來了》、《救妻同學會》、《鐵探》、《白色強人》、《金宵大廈》、《街坊財爺》、《十二傳說》、《大步走》、《使徒行者3》等,她兩度參與旅遊節目《3日2夜》,當中不乏泳裝出鏡,34E巨咪大解放,令人印象深刻。

<!--AD--><div class="footerAds clear">第一手消息請下載on.cc東網<a href="http://itunes.apple.com/hk/app/id349812998?mt=8" target="_top">iPhone/</a><a href="http://itunes.apple.com/hk/app/id387862928?mt=8" target="_top">iPad/</a><a href="http://market.android.com/details?id=com.news.on" target="_top">Android/</a></div><!--/AD-->

日前去元朗睇裝修,與師傅密密斟。
睇完裝修,去埋街市揀榴槤睇行情。
逆市開分店,Nicole未驚過!