楊明承諾養莊思明:下半世交畀我

東方日報
莊思華代妹妹莊思明出席楊明的分店開幕。

楊明與莊思明拍拖以來愛得甜蜜,昨日男方有份投資的燉湯店開張,有工作在身的思明拍片道賀,撒嬌指下半生靠男友。而楊明豪氣應承女友要求,並稱冇人夠膽和他爭女。二人隔空放閃,甜到漏!

楊明投資的第三間燉湯店昨日開張,圈中好友陳煒、陳曉華(Hera)、張振朗、林淑敏、許家傑和莊思華等撐場,因開工未能現身的女友莊思明拍片道賀,揚言下半生靠男友。

「邊個夠膽同我爭」

楊明透露新店與四位拍檔共投資7位數字,資金由兩間分店所賺的錢湊合,目標於本港19區都有分店。問到可會到舖頭做生招牌?他說:「主要做樓面嘢,收銀唔識,伙記都係叫我出去執餐,通常啲客要求合照都有求必應。(叫思明入股?)冇啦,財政獨立嘛!」提到思明揚言下半世靠他,他笑言:「真係身負重任,同埋佢下半世都應該交畀我。(承諾咗?)少少啦!不過未計劃結婚。(開晒19間先娶佢?)事業基礎為重,要照顧到未來家庭先。(落訂封盤!)唔使,都封咗,邊個夠膽同我爭?」

Hera自爆有興趣做美容生意:「因為可以氹到好多女士,但乜都未計劃,依家要識多啲人先。以前我花好多錢喺美容度,但知道做得多Facial對皮膚唔好,依家都做少咗。記得選港姐前一年爛面,等到慢慢好先參選。」

許家傑想開酒吧

至於林淑敏與許家傑異口同聲表示,平日拍外景會到楊明的分店幫襯,許家傑笑言:「有次同佢啲伙記講識得楊明,問有冇折,點知佢話唔知邊個係楊明,楊明聽到仲話要了解吓。」又透露有意與《愛.回家之開心速遞》劇組夾份開酒吧:「劇入面我開酒吧,仲可以幫手核數,因為以前我做過核數嘅。」

莊思明有工作在身,拍片支持男友。
許家傑與林淑敏有意開酒吧。
陳曉華晒纖腰。