楊怡報喜 羅仲謙:問清楚醫生未?

東方日報
羅仲謙、楊怡上載照片公布喜訊。

40歲楊怡與35歲羅仲謙被本報率先爆努力造人成功佗鼠BB,昨日情人節前夕網上報喜,貼出BB超聲波照,留言指二人由朋友變伴侶,夫婦之間會加入一顆小小電燈,並為BB改乳名「小羅白」。又指楊怡踢爆老公知道喜訊後第一個反應是:「你唔好亂咁噏吖,你問清楚醫生未?」而她首次聽見BB心跳聲,笑言似火車經過的聲音!

榮升準爸爸的謙仔,昨午2時許驅車離開大埔寓所往健身操Fit,記者恭喜他時,他難掩興奮笑笑口連聲多謝,問到BB性別,卻表示不想多講。又透露太太預產期於5月底,會留港待產。對於被爆初時不敢相信太太有喜,謙仔說:「我初時係比較冷靜,冷靜之後其實係一份喜悅。(太太擔心疫情減少出街?)我出街後都會除晒衫褲狂消毒,做足清潔,唔想帶咗細菌返屋企。阿怡都少咗出街,佢喺屋企都會郁吓、運動吓,人多地方唔會去啦。佢要出街我都會陪住佢,去啲空曠地方。(使唔使撲口罩?)暫時都夠用,有朋友幫手買。」之後他在體育館門外量體溫、消毒雙手,再內進做Gym。

羅仲謙被恭喜當爸時,合十致謝。