楊思琦加入樂壇即攞新人獎 連老公都唔信

有圖為證,冇得唔信啦!

楊思琦在第三屆AEG音樂排行榜頒獎典禮,獲頒「鑽石新人獎」及「鑽石全方位歌手」,曾唱過兒歌的她,正式進軍樂壇即奪得新人獎,她坦言好開心:「好意外,係第一次有首屬於自己嘅歌,係講自己嘅經歷,關於愛情嘅嘢,真係冇諗過大家有留意到我呢首歌。」她表示得獎有話畀老公聽:「佢都好意外,佢自己都冇諗過,我哋嚟講有一種特別嘅意思。」

囝囝生於疫情爆發時期,她表示因為疫情嚴重,家居一定要做好清潔,每次外出後,成副武裝要清洗,她說:「都唔敢帶佢出街,因為佢太細個,(會搞百日宴?)盡量少啲聚會,冇諗住搞百日宴,始終少人地方安全啲。」她表示因為女兒不用返學,所以變得好忙碌,她說:「個女成日要網上學習,所以我由朝到晚好忙,湊完細佬,夠鐘就要安排個女上網上堂,跟住又再湊細佬,根本冇停過,而小朋友最開心可以睇住個ipad,如果唔係要網上教學,好少畀佢睇太耐電腦,因為驚影響視力。」

她表示已為復出作好準備,不過剛坐完月的她仍要努力減磅,她說:「比起未生前仲差十幾廿磅,我要努力做運動。」