棄港姐光環!葉翠翠龐卓欣做KOL一樣掂

龐卓欣轉做美容扮靚KOL,而翠翠就專攻媽媽市場。

「十優港姐」麥明詩放下港姐冠軍光環,放棄五光十色嘅娛樂圈,甘願做打工仔,喺著名跨國顧問公司擔任商業顧問,雖然收入比起藝人少成一大截,但可以學以致用,麥明詩坦言會努力工作,暫時唔打算重返娛圈。其實過往都有唔少港姐同麥明詩一樣,毅然放下港姐光環,轉型做平凡人,追尋自己嘅夢想!

陳凱琳

2013年港姐冠軍陳凱琳,卸任後備受無綫力捧,喺《萬千星輝頒獎典禮2015》更勇奪「飛躍進步女藝員」,事業如日方中之際,2018年下嫁鄭嘉穎,翌年後為對方誕下囝囝鄭承悅,隨即減產相夫教子。而早前宣布再度有喜嘅佢,更同朋友合資搞化妝棉生意,一推出就已經賣斷市,生意咁快已經上軌道,令佢有更多時間去照顧家庭。


朱千雪

2012年港姐季軍朱千雪,素有「民選港姐」之稱,獲無綫重用嘅佢,喺2015年毅然向公司請假重返校園讀碩士,及後又再攻讀法律博士課程,有傳她更殺入「Law界」做「律政可人兒」。為專心學業,朱千雪只偶爾出席活動,未有拍劇,雖然早前喺劇集《降魔的2.0》以客串角色亮相,但至今已有三年冇見過有朱千雪擔正嘅劇集播出。


葉翠翠

2005年港姐冠軍葉翠翠,喺無綫拍劇多年,在2016年因要照顧家庭離巢。現時育有三子的她,不時喺社交網開直播分享扮靚及日常生活心得,因而成為網紅,更喺媽媽界嘅購物指標,除獲得大批網友支持外,更經常為網友爭取購物福利,現時個人專頁擁有超過27萬粉絲,非常成功。


龐卓欣

2015年港姐亞軍龐卓欣,卸任後即離開無綫,開設社交網頻道拍片做KOL,分享美容扮靚心得,更不時以網紅身份出席活動,又經常去旅行,享受人生,不受拍劇束縛,自由自在。