梅根脫離王室 重返影視界可以點搵食?

近日外地最火爆嘅政壇新聞及娛樂新聞,一定要數英國王子伉儷哈里及梅根「脫皇室」事件。事緣公爵夫人梅根備受狗仔隊及傳媒花邊新聞困擾,愛妻心切嘅哈里唔希望重轁母親戴安娜覆轍,喺社交媒體公佈自己與太太將會辭去主要皇室職務,並將會財政獨立,唔會再收公帑云云!

個爆炸性公佈接近先斬後奏,皇室唯有急急召開會議討論相關安排,由於英國皇室無類似先例,所以件事既係國際要聞,同一時間又係花邊新聞。唔少媒體猜測哈里同梅根下一步會做咩,依家鐵定嘅係佢地一家三口未來會分別喺英國及加拿大兩國居住。

唔用公帑嘅佢地亦唔愁無錢,因為單係成為註冊商標嘅「薩塞克斯公爵及公爵夫人」預計已經為二人每年來嚟可觀收入。而且擁有高知名度嘅佢地仲可以接好多演講活動,甚至有人估計梅根有可能重返荷里活拍戲,或者好似前任美國總統奧巴馬伉儷咁出書、同Netflix合作監制節目《美國工廠》、Fifth Risk等。

梅根會唔會重操故業做返女演員仲係未知之數,不過根據英國媒體The Times透露,梅根早於公佈「脫皇室」事件前,已經同迪士尼簽訂合作,為其新片配音以換取迪士尼對保育機構Elephants Without Borders嘅捐款及支持。有人更翻出迪士尼電影《獅子王》於倫敦首映時片段,指哈里王子紅地壇上就有同迪士尼高層講「你知道梅根識配音嗎?」嘅對話,網民查証嘅功力真係非同少何。

以往都有女星嫁予政壇大人物,不過通常都係嫁人後就息影,如果梅根復出拍戲相信會衝撃固有皇室人員嘅既定印象,不過本身佢作為首位非英藉有色人種嫁入皇室,已經好破格,配合反叛嘅哈里齊齊脫離皇室職務,都算革新歷史悠久嘅英國皇室印象!試問英女皇登基以嚟,有幾何出個啲咁私人風格,咁愛孫心切嘅新聞稿?