梁詠琪廣東歌陸續有嚟

東方日報
快將開紅館騷的江海迦,當然要向前輩梁詠琪討教心得。

歌手梁詠琪與江海迦(AGA)前晚到九龍灣為ViuTV音樂節目《Chill Club》擔任嘉賓,梁詠琪最近忙於宣傳新歌《平安夜》,歌曲反應好將會推出新版本,問她可有計劃開騷?她說:「依家有兩隻廣東歌,預計會做十隻廣東歌,嚟緊忙錄音,做廣東歌係好開心。」

問到女兒可識唱她的新歌?梁詠琪笑說:「佢識唱,因為要喺屋企練歌所以成日播,佢依家已經唔係聽兒歌,會聽一啲少女嘅英文歌,仲同我爭住播歌。我都有播吓以前嘅作品好似《短髮》等佢學吓普通話。」她透露農曆新年將會放假休息,希望趁佳節向女兒灌輸傳統知識:「佢依家大個啲,會教吓佢拜年、斟茶畀父母,因為孝道呢樣嘢喺西方文化嚟講冇咁強烈,希望佢唔好咁鬼妹啦!佢都算聽教聽話嘅。」