梁競徽衝出國際 惡搞遊行照驚現歐洲新聞節目

Euronews報道香港情況時,清楚出現唯唯大頭相

近日香港因修訂《逃犯條例》引發巨大爭議,令到大批民眾上街遊行。近年轉戰內地市場嘅梁競徽(原名梁烈唯)喺遊行中多次「被出現」,遊行相片喺網上瘋傳後,搞到唯唯喺微博親自澄清當日冇去遊行,圖片係被網民惡搞。但一班網民一於少理,實行繼續惡搞。喺星期日嘅遊行中,有人將唯唯個樣印成海報,並加上「人民英雄」等字眼派發俾遊行人士。市民喺遊行期間,高舉印有唯唯個樣嘅海報,更被其他遊行人士及市民拍照。

歐洲新聞台Euronews報道香港情況時,竟然影到呢張海報,更清楚顯示唯唯嘅大頭相,相信有睇Euronews嘅人都會見到唯唯。其實Euronews嘅新聞全世界都會播放,香港市民無疑係暗中幫唯唯打入國際市場。唯唯如果有一日進軍國際,千祈唔好忘記香港人幫過你宣傳呀!

Euronews報道香港情況時,清楚出現唯唯大頭相
梁競徽