梁漢文譚詠麟合照遭網民洗版留言歌迷割席 梁漢文嘆委屈:問心無愧

依家做粉絲唔再係單單睇偶像靚唔靚仔咁簡單,偶像嘅一舉一動,甚至佢嘅品格亦會影響心目中嘅形象,近年就連佢嘅政治取向亦成為粉絲嘅優先考量因素。

梁漢文前排就同「校長」譚詠麟、陳百祥、李克勤等「明星足球隊」以波會友,之後就同警方高層謝振中影咗張合照。譚詠麟將呢張照片放上微博,點知就搞到梁漢文嘅IG被網民瘋狂洗版,粉絲紛紛留言話對佢好失望。

譚詠麟微博

梁漢文今日就喺FB專頁表示自己只係單純地影一幅相,點知就俾人鬧,覺得好無辜:「等咗半年先踢到一場波,估唔到依家踢場波難,原來做人更難。踢完走,校長拉住話影張相......做人應該尊重前輩..... 影張相,原來會被人覺得犯下彌天大罪。天下判官何其多,我問心無愧便是了。 #明就明 #唔明我都冇咩好講 #多謝默默關心緊張問候我的所有朋友」之後更加順便放埋自己首《正氣歌》,似乎暗指自己冇做錯。

梁漢文

不過一班粉絲似乎就唔收貨,除咗俾嬲嬲之外,仲紛紛留言話:「問心無愧便是了,咁打出黎做乜😂自己問心問飽佢呀嘛!」、「扮咩吖,係藍咪大方啲認左去囉」、「影完張相之後,你個人已經距離正氣呢兩個字好遠了」、「送飛都唔睇」及「算吧啦你」等等。另外,同時亦有網民表示支持佢。