柏林影展開鑼 3部華語片角逐金熊獎

話咁快就初七,除咗祝大家人日快樂,仲要祝福大家開工大吉!之前同大家分享咗美國嘅電影大獎,包括金球獎得主及奧斯卡提名;今日就同大家飛轉歐洲,睇睇現正舉行嘅柏林影展競賽部份有咩入圍華語電影。

柏林影展與法國康城影展、意大利威尼斯影展同為歐洲最大型嘅國際影展,論規模同星光,比起奧斯卡有過之而無不及。不過媒體報導嘅數量就弱好多,主要原因相信同影展選片範疇有莫大關係。相比美國以荷里活出品為主,歐洲影展選片國際化得多,電影議題亦相對宏觀,由人民關懷、難民問題到性小眾都有涉及,任何國家出品都有機會成為大獎得主,籠統啲形容,藝術片多、商業片少。

今年參展柏林影展嘅華語片唔算多,有婁燁導演,井柏然、馬思純主演,據聞陳冠希有客串不過唔知剪剩幾多嘅 《風中有朵雨做的雲》;仲有由田壯壯監制、白雪執導,講述中港關係單親兒童嘅《過春天》。而競賽部份就有內地導演王小帥、《圖雅的婚事》《白鹿原》導演王全安及香港觀眾好熟悉嘅張藝謀導演。

王小帥導演第3次入圍柏林影展競賽部份,2001年憑高圓圓、周迅參演嘅《十七歲的單車》獲得銀熊獎評審團大獎,08年再憑《左右》獲得銀熊獎最佳劇本獎,今年以《地久天長》再次入圍競賽部份。故事講述沈英明同劉東2家人本係好朋友,後來因為1次意外而漸行漸遠,其中一家由北方搬到南方,30年後因為養子而重新聯繫嘅故事。養子劉星由人氣偶像TF Boys嘅王源飾演,會唔會因此吸引到年輕影迷入場呢?

王全安導演第4次入圍柏林影展競賽,2007年憑《圖雅的婚事》獲得金熊獎最佳影片;2010年憑《團圓》獲得銀熊獎最佳劇本;2012年憑《白鹿原》提名金熊獎,作品多次獲國際影展認可。不過近年見報最多嘅原因,反而係導演與曾經係星女郎嘅張雨綺閃婚閃離,希望全蒙古語嘅新作《恐龍蛋》可以將大家嘅注意力帶返去作品身上。

最後仲有張藝謀導演新作《一秒鐘》,前作由鄧超、孫儷主演嘅《影》,香港上個月先剛剛上畫,依家已經有新作參賽,導演創作力好驚人!

張導貴為國際大導、影展常客,已經5次入圍柏林影展競賽部份,早於1987年憑《紅高梁》首奪最佳影片金熊獎;1999年憑《我的父親母親》獲得銀熊獎兼捧紅咗章子怡;2002年嘅《英雄》獲得Alfred Bauer獎;2009年《三槍拍案驚奇》獲金熊提名,對上一次入圍但唔參賽嘅有2012年《金陵十三釵》。

今年以文革時期背景,講述2個陌生人為咗電影其中一秒而結緣嘅《一秒鐘》,再次入圍柏林影展競賽部份。張藝謀導演今次回歸基本訴說電影嘅力量,會否再次為佢帶嚟金熊大獎呢?