林文龍被玩燒埋翠如嗰疊

東方日報
林文龍不甘身份被玩,拉埋翠如落水。

亞視高層林文龍昨日破天荒為主演的無綫新劇宣傳,拍檔黃翠如笑問他可會安排友台幫手谷劇,卻被反擊取笑是「蕭Auntie」,又稱她是有線鎮台之寶,相當爆笑。

藝人黃翠如、林文龍與連詩雅等昨日為劇集《那些我愛過的人》宣傳,身為亞視副總裁的文龍「踩場」入無綫宣傳,身份尷尬。台上分享時,翠如笑問「副總裁」會否安排友台為《那》劇宣傳?他即反擊指司儀區永權與翠如皆來自有線電視,稱她是有線鎮台之寶,又取笑她是「蕭Auntie」,翠如笑說:「佢好衰,第一日見已經咁嗌我,當時我仲未公布結婚。」劇中拍檔馮素波指文龍不是無綫藝員也來宣傳,希望有機會再演母子,他即對台下高層笑說:「你即係難為佢哋啫!」

講明最後一套

今次文龍是首位以亞視高層身份到無綫谷劇,他笑言感覺幾得意:「好似離開十年之後再返嚟拍劇嘅感覺,現階段可能係喺TVB嘅最後一套!今次係無綫邀請,有時間都會再宣傳。(帶隊去亞視宣傳?)娛樂圈應該百花齊放,同Felix(杜之克)傾偈嗰陣佢話使唔使擺喺你哋嗰邊上,我就冇所謂!又唔係直接嘅競爭對手。(有機會成事?)我Open嘅,但係要商量同睇公司政策。(有傾過合作?)冇,冇咁詳細。(最後一套劇?)現階段係,亞視劇都唔拍住,因為冇時間。公司架構上好多嘢要處理,亦搵緊台前幕後。(喺TVB挖角?)有同前同事傾過偈,依家TVB自由度高好多。」活動後,兩台高層文龍與杜之克擊拳,惺惺相惜。

至於飾演林文龍女兒的蘇皓兒,笑指初見對方時被其氣場嚇親,但認識後覺得他風趣幽默。她又不擔心與劇中三角關係的顧定軒及李任燊傳緋聞,因他們是由細玩大的朋友。

黃翠如被叫「蕭Auntie」,好嬲又好笑!
蘇皓兒與林文龍演父女,讚他風趣幽默。