林夏薇陳展鵬夜麻麻被圍

東方日報
林夏薇與陳展鵬到蘭桂坊拍攝重頭戲,吸引大批人圍觀。

視帝陳展鵬、林夏薇(薇薇)及康華等日前到蘭桂坊開工,引來大批酒客圍觀,薇薇大讚途人守規矩。扮演危險人物的康華自爆嚴重畏高,日前拍攝危站戲,令她相當緊張,要投降找替身幫手,且透露日內將「慘遭強姦」。

無綫新劇《逆天奇案》日前在蘭桂坊拍攝,劇情交代「危險人物」康華報仇心切,計劃於鬧市作出「高危動作」,展鵬及薇薇等集齊人跟蹤及盡力阻止不幸事件發生,最終成功。由於重頭戲涉及角色人物眾多,附近不少酒客步出睇熱鬧,薇薇稱途人秩序井然:「呢場戲前後拍足兩日,不過大家都好幫手,完全冇影響拍攝進度,都係趁停機想影張合照啫!途人又好Nice咁同我哋講聲加油。」

原來劇中康華因早年被強姦,致心理留下陰影,被仇恨沖昏頭腦而對社會作出攻擊性行為。

危站高樓頂唔順

她說:「強姦戲就嚟拍,但日前拍咗我危站10層樓嘅戲份,當時簷篷闊度只係夠企到半隻腳,對我哋呢啲畏高嘅人嚟講難度好高,本來想頂硬上,但拍咗一陣都係頂唔順換咗替身。」談到畏高症,她靦腆地說:「最嚴重時其實連搭的士都暈車浪。(點搭飛機?)逼自己搭咗好多次,仲要食埋藥先可以克服。」

演員今次合作相當愉快,當晚未埋位,即拉隊到附近「飲嘢」,打發時間兼增進感情,康華說:「真係好難得,平時大家好忙,想約食飯都未必齊人,反而嗰晚熱熱鬧鬧。能夠寓工作於娛樂,都幾開心。」而一身Slim Cut西裝造型的展鵬體重又再跌,拍打戲相當瀟灑,他笑說:「一定要Keep住,如果唔係會畀人話!」

陳展鵬
康華演的角色報仇心切,結果被制服!