《東張西望》15周年 陳庭欣蝦碌金句打入經典

東方日報
陳庭欣落手落腳搞網購生意。

陳庭欣有份主持的節目《東張西望》迎來15周年紀念,陳豪、胡定欣與黎耀祥是節目訪問次數最多的藝人,齊齊獲封「人氣之王」。陳庭欣自言做主持經歷了不少蝦碌事,一句「食燈籠、玩月餅」更成為搞笑金句,被網友笑足幾年!

無綫節目《東張西望》15周年紀念,加上邁向4,000集,台前幕後前晚在節目結束後切蛋糕慶祝,並邀來特別嘉賓陳豪、胡定欣及黎耀祥,由高層頒發「人氣之王」獎牌,事關經統計後,他們接受節目訪問次數最多。

挑戰網購生意

節目主持之一陳庭欣加入《東張西望》大家庭約4、5年,經歷了不少:「坦白講,當初好多蝦碌嘢,好似講錯『食燈籠、玩月餅』,依家仲有人舊事重提。又例如曾守明哥哥去世,我忍唔住哽咽。之前嗰隻鸚鵡離世,夜晚要主持節目,畀人發現我眼泛淚光。」

談到男友決定退股健身室,她表示:「佢想集中精神搞好佢嘅生活用品店生意先,不過我哋鍾意做運動,會喺健身室繼續『老是常出現』。」又指早前與孫慧雪合作網購,連打燈都落手落腳幫忙。

胡定欣等時機公布去向

至於陳豪及胡定欣齊齊受訪,感激節目記錄了他們的人生點滴。定欣表示上次亮相無綫節目,已是數月前的事,再被追問合約問題時,她說:「一直有同公司傾,適當嘅時候會公布。」並透露最近榮升姑媽,有幫手湊B,更被餵夜奶嚇窒,聽到生B就怕怕!

陳豪家中有3位小朋友,問到如果再追,會否斷擔挑?他笑說:「都係多雙筷子啫!不過坦白講,追到個女已經好美滿,可以見好就收。」

胡定欣幫手餵奶搞唔掂,陳豪唔介意指點一番。
梁麗翹(左起)、朱凱婷及陳貝兒扮靚靚慶祝節目15周年。