李龍基再做老竇夢碎 太太臨盆前小產

東方日報
李龍基的太太佗BB近九個月卻小產,回應時只輕嘆一聲,十分無奈。

現年69歲的李龍基早年失婚,但有心有力的他再邂逅現任太太,去年更傳來喜訊太太有B,本應開心迎接小生命,可惜本月預產期前突然傳來壞消息,再做老竇的美夢成空!他昨日受訪時只答心情OK便作罷,不欲多言。

無綫藝人李龍基成為TVB「御用皇帝」,最近一次演皇帝便是在《宮心計2深宮計》中,飾演唐玄宗李龍基的父親李旦,現實中的他似皇帝同樣風流!唱得又風趣的李龍基,早年在訪問中自認花心與多情,亦受不少女性歡迎,雖然年輕時有過一段婚姻,並育有三個孩子,但最後離婚收場。20年前,他認識現任太太,雙方年紀相差達28歲,幸好「父女戀」拍拖四、五年後仍修成正果,拉埋天窗。愛錫太太的他,因擔心會早走一步,故將多年來於中港所買入的七個物業,全數歸於太太名下,婚後為遷就身為內地人的太太,索性移居深圳。據知,兩人去年成功造人,預產期是今個月!面對新冠肺炎肆虐,他為安全起見,兩夫婦搬回香港錦田居住,以迎接小生命。

受訪輕嘆一聲:唔想多講

李龍基今次老來得子,興奮之餘亦一直保持低調,而現年41歲的基嫂為怕胎兒「小器」,除了全程小心翼翼護胎外,亦不讓太多朋友知道,事前曾向閨蜜訴說:「因為好驚好似如周潤發、張衞健咁,佢哋太太懷胎近8個月都可以冇咗!」盡量低調安胎,怎料卻一語成讖!基嫂在臨盆前數日竟意外小產,夫婦二人相當難過,記者昨日致電慰問,當問及這個不幸消息,他不欲多言並輕嘆一聲,問到心情如何?他說:「OK啦!(太太身體如何?)都OK!其他我唔想再多講。」說罷匆匆掛線。

陳煒戥傷心 呂珊:再接再厲

曾經在《深宮計》中演李龍基妹妹的陳煒,昨日得悉對方情況亦戥其傷心,她說:「我見過阿嫂,佢哋好Sweet,之前我哋喺橫店拍《宮》劇嗰陣,阿嫂都有嚟探班。(會唔會慰問阿嫂?)雖然我唔知佢有咗,但今次小產,希望佢快啲調理好身體,唔好太傷心!」至於在劇中演皇后的呂珊昨日回覆:「兩個幾月前見面都恭喜咗佢。(但太太小產咗!)哦……佢(李太)都有咗7、8個月(口架)啦喎?之前都有見過阿嫂嘅。不過唔使擔心基哥嘅,因為佢真係好勁,相信會再接再厲。」

至於資深歌手陳浩德跟李龍基是數十年好友,他昨日受訪表示幾日前才跟對方食飯,問到是否知道他再做爸爸?陳浩德說:「呢啲你問佢啦,我哋唔講呢啲私人事。(知唔知李太小產咗?)我識佢太太,但呢啲冇聽過,冇問過。」同樣常有聚會的藝人吳香倫昨日透露事前知道李太有喜:「不過唔知道佢小產!(會慰問佢?)如果佢唔公布,暫時都唔想打擾佢。」

兩夫婦返港待產,可惜好夢成空。
陳煒希望基嫂調理身體要緊,不要太傷心。