李靖筠愛上陳家樂 雪中獻吻

東方日報
家樂今年有兩部電影賀歲,而Gladys亦獲力捧,拍住上!

陳家樂、李靖筠主演愛情電影賀歲,不約而同表示拍攝時全情投入,當正對方是愛人,尤其一場浪漫飄雪接吻戲,更令他們感到濃濃愛意,咀戲自然流露!

藝人陳家樂與李靖筠(Gladys)主演的英皇電影《我的筍盤男友》是賀歲檔,雖然面臨各方勁敵,但他們直言壓力不算太大,家樂說:「幾套戲唔同戲種,我哋盡力演好角色,盡演員嘅責任,其他嘢唔到我哋控制。」Gladys表示現時心情興奮多於一切,始終作為新人有機會參演賀歲電影,實屬難得,所以不敢想太多。

片中有場浪漫飄雪場面,兩人在雪中咀嘴,雖然是第一次合作,但他們表示拍攝時沒尷尬,更揚言咀嘴一刻愛上對方,家樂說:「嗰場戲真係好浪漫,令人好易代入。成日話少女有呢啲雪景夢,其實男人都有,嗰刻嘅環境、氣氛,真係會覺得自己好愛對方。」Gladys亦認同家樂的說法:「嗰場戲真係冇難度,單單外在環境,已經成個少女心湧現咗出嚟。嗰場咁啱係套戲嘅最後一場,之前角色遇過嘅一切都浮現出嚟,好自然就可以流露愛意!(嗰刻愛上對方?)成套戲都愛上佢,當然係戲入面,因為『阿寶』(戲中角色)個世界好需要佢。」

感激張家輝提拔

Gladys的角色相當講義氣,她直言現實中同樣「友情第一」:「人愈大愈明白,好多嘢得來不易,我好珍惜依家擁有嘅友誼,非常願意為佢哋付出。」家樂亦然,更對「情義」看得很重:「如果有人幫過我,我會好記得,有能力嘅時候,而對方又需要我幫忙嘅話,我會赴湯蹈火!(有冇圈中人幫過你?)入行拍第一套電影《保持通話》,能夠做到徐熙媛(大S)嘅細佬,係個比較重嘅角色,全因張家輝!原本我係演一出場就被射死嘅角色,但因為演大S細佬嘅演員嚟唔到,家輝就向導演推薦我,幫我爭取一個咁多戲嘅角色,我到依家都好記得,亦好多謝呢位前輩。」

郭奕芯欣賞Bob型仔

另外,家樂及郭奕芯昨日接受電台訪問宣傳新片,大談拍攝趣事及對愛情的看法。主持薛家燕問家樂有否拍拖,他表示現時單身,所以想多拍愛情片感受。而郭奕芯與Bob演情侶,片中角色認為Bob比家樂更型!她大讚Bob的演技很有感染力,笑言雙方親熱戲不多,很快就可以抽離角色。

兩人談情,沉醉在浪漫氣氛之中。