李綺雯4月離巢喺網絡覓出路 呢班前無綫藝人做KOL好成功

「𡃁妹」李綺雯疑因政見而被雪藏半年,並將於4月約滿離開無綫,不過佢宣布已經喺影片分享網站開設個人頻道。其實現時都有唔少前無綫藝人向網絡進發,而家就同大家數一數啦!

李綺雯

現年35歲嘅「𡃁妹」李綺雯,2006年由亞視過檔無綫,之後都參與過唔少劇集拍攝,雖然絕大部分都係飾演配角,但都有唔少搶眼角色,例如《愛·回家之開心速遞》賀碧雲、《大醬園》陳映雪、《鐵探》阮氏桂、《護花危情》張麗娟及《情越海岸線》朱鈴鈴等等。不過李綺雯疑因政見而被雪藏半年,最近佢就向傳媒透露將於4月約滿離開效力14年嘅無綫。前日佢喺個人社交網站宣布已經喺影片分享網站開設個人頻道,雖然未有片睇住,不過佢就建議大家訂閱咗先,仲搞笑話以後食粥食飯就睇大家。

林芊妤

林芊妤(Coffee)擁有34D魔鬼身材,因「殘廁gathering」而聲名大噪,更遭無綫解約。近年佢由藝人轉型做教瑜伽,仲經常拍片教大家做瑜伽減肥操肌。呢位「瑜珈女神」非常厲害,唔經唔覺就已經喺影片分享網站個人頻道累積超過90萬訂閱者。

宋熙年 & 陳智燊

陳智燊(Jason)同宋熙年(Sarah)喺無綫主持節目《港生活.港享受》認識而相戀,佢哋於16年拉埋天窗。人前人後都非常恩愛嘅佢哋先後離開無綫,現時主要做司儀及開設網上頻道,同大家分享食譜及旅遊等等資訊,佢哋嘅影片分享網站個人頻道已經有超過12萬訂閱者。之前有報道指佢哋兩公婆每人每月可賺15至20萬,人工比以前喺無綫工作高。

葉翠翠

2005年港姐冠軍葉翠翠,入行後發展平平。喺2016年葉翠翠自爆被減薪三分一,2017年約滿離開無綫。近年由港姐變KOL,做足資料搜集嘅佢,經常喺網上同大家分享孕婦、保健美容及湊仔嘅心得,專頁已經成功吸引超過27萬網民讚好。

陳琪

陳琪喺2017年拍完《宮心計之深宮計》後離巢無綫,為咗可以多啲時間照顧家庭,陳琪就選擇做KOL。喺初初轉型嘅頭三個月,佢嘅收入唔多,全靠佢不斷努力研究,及了解觀眾嘅需要,佢越做越好,佢嘅專頁而家已經超過11萬位追蹤者,仲獲得唔少品牌垂青。

陳倩揚

2008年港姐亞軍陳倩揚(Skye),入行後主要擔任主持工作,離開無綫後佢漸減幕前工作,陳倩揚成為KOL後,除咗經常喺社交網站分享育兒心得、食譜及化妝扮靚等等資訊,佢嘅專頁已經吸引超過6萬網民讚好。