李日昇戒肥膩寸爆前度黃文意

東方日報
李日昇經過4個月努力,已經練成渾身肌肉。

近期被爆曾戀36D黃文意的藝人李日昇,近月跟爆肌男郭子豪做Gym,火速練成一身肌肉,意有所指笑言健身最重要是「戒食肥膩嘢」!講到現任圈外女友,日昇Sweet爆稱呼對方做「大人」!

大隻肌男郭子豪早前苦練10個月操爆肌,最終贏得健美先生冠軍,回歸拍劇的他雖要減磅,仍不忘將操肌精神感染身邊戰友,近月就將童星出身的李日昇由孱仔進化成「未來戰士」。

日昇約4個月前跟郭子豪做Gym,跟足時間表和餐單,火速練成爆肌!最近爆出曾戀36D黃文意的他曾戲言:「食錯嘢難免會肚屙」,訪問期間他跟子豪一唱一和,表示健身最重要是飲食,子豪說:「做Gym都一樣,年輕人唔好亂食嘢!」日昇再說:「大個仔要注重飲食,揀啱嘅嘢食,依家要戒食肥膩嘢!」

冧講圈外女友

除了想令身形更靚,最近他又考健身牌,希望多條出路,賺錢帶阿媽去旅行及儲老婆本。講到跟圈外女友Iris的關係,日昇甜到爆表示平日的健康餐都是對方炮製:「一星期操四至五日,食嘅嘢係雞胸、西蘭花,都係『Iris大人』煮嘅!(女友有冇好欣賞你啲肌肉?)聽講獅子座女仔鍾意人大隻,佢又唔似特別鍾意肌肉,可能係暗爽。」

他直言不想再做病童或孱仔角色:「想挑戰其他嘢,想做堅強角色或奸角。(仲有咩目標?)以前我冇腹肌,呢幾個月啲腹肌明顯咗,挑戰緊第七、第八舊,希望維持到半年,為自己人生留念。」

長期節食考毅力

子豪都讚他的目標「夠堅」:「其實好辛苦,佢同我唔同,我當時要操大,佢係要線條,佢話以張繼聰為目標,要腹肌夠明顯,脂肪比例要10%以下,長期要On Diet,日昇加油!」

場地:Goji Studios

練到有麒麟臂!
郭子豪讚李日昇有毅力,不怕辛苦。